П.Буяндэлгэр ДБНХ-ны Гүйцэтгэх зөвлөлийн гишүүнээр сонгогдлоо

Дэлхийн Бөхийн Нэгдсэн Холбоо (UWW)-ны сонгууль Албанийн нийслэл Тирина хотод боллоо. Сонгуулиар Монголын Чөлөөт Бөхийн Холбооны Удирдах Зөвлөлийн гишүүн, Азийн Бөхийн Холбооны ерөнхий нарийн бичгийн даргын алба хашдаг П.Буяндэлгэр UWW-гийн Гүйцэтгэх Товчооны Зөвлөлд нэрээ дэвшүүлсэн юм.

Дэлхийн Бөхийн Нэгдсэн Холбооны гүйцэтгэх зөвлөлд 15 хүн нэрээ дэвшүүлсэн байна. П.Буяндэлгэр энэ сонгуульд ялснаар Монгол Улсын түүхэнд олимпын төрлөөр Олон Улсын Спортын Холбооны удирдах дээд зөвлөлд сонгогдсон анхны бөгөөд эмэгтэй зүтгэлтэн болов.

П.Буяндэлгэр 2021 оны дөрөвдүгээр сарын 12-нд Казахстаны Алматы хотод болсон Азийн Бөхийн Холбооны хурлаар ерөнхий нарийн бичгийн даргаар сонгогдсон билээ. 

Тэрбээр 2014 оноос хойш Монголын Чөлөөт Бөхийн Холбоонд ажиллаж байгаа юм.

Н.Яригуина 2018 оноос холбооны дэд ерөнхийлөгчөөр ажиллаж буй бол Катарын З.Шахрани, Унгарын П.Баша, Португалийн П.Сильва нар 2018 онд Гүйцэтгэх зөвлөлийн гишүүнээр сонгогдоод энэ жил хугацаа нь дуусаж байв.

Гүйцэтгэх Зөвлөлийн гишүүн нь зургаан жилийн хугацаатай сонгогддог аж.