Уншиж байна ...
Зураг
Зураг

Орос улс Эстони улстай залгаа хилийнхээ тэмдэглэгээг буулгасныг Европын Холбоо эсэргүүцэв

Т.Давааням, ikon.mn
2024 оны 5 сарын 25
iKon.MN
Зураг зураг
Эстонийн хил хамгаалалтын албанаас нийтэлсэн гэрэл зурагт Оросын тал хилийн тэмдэглэгээг хурааж байгааг харуулжээ

Пүрэв гарагт ОХУ-ын тал Эстони улстай залгаа хилийг заагладаг тэмдэглэгээнүүдийг буулгажээ.

Нарва голын дагуу хоёр улсын усан хилийг тогтоох 50 хөвүүр тэмдэглэгээ байрлаж байсны 24-ийг нь Пүрэв гарагийн шөнө Оросын талаас буулгасан тухай Эстонийн хилийн албаныхан мэдээлсэн байна. 2022 онд Украины дайн эхэлснээс хойш Орос болон Балтийн тэнгисийн орнуудын хилийн нөхцөл байдал хурцдаад байгаа.

Баасан гарагт Европын Холбооны удирдлага Оросын энэ үйлдлийг эсэргүүцсэн мэдэгдэл гаргажээ.

“Хил дээр гарсан энэхүү хэрэг явдал нь Оросын зүгээс Балтийн тэнгисийн бүс нутаг дахь далай, хуурай газрын хилийг хамруулдаг өргөн хүрээтэй өдөөн хатгалга болон гибрид үйлдлийн нэг хэсэг юм” гэж Европын Холбооны гадаад бодлогын тэргүүн Жозеп Боррел анхааруулсан байна.

Эстонийн ерөнхий сайд Кая Каллас үүссэн нөхцөл байдлыг тодруулахаар Оросын талтай холбогдон ажиллаж байгаагаа мэдээлжээ.

Тэрбээр уг үйлдлийг Москвагийн зүгээс “хөрш улсдаа айдас, түгшүүр үүсгэх зорилгоор хилтэй холбоотой арга хэрэгслийг ашигладаг өргөн хүрээтэй үйл ажиллагааны нэг хэсэг” гэж тодорхойлсон байна.

Эстони улсын гадаад хэргийн яам үүнийг “хилийн өдөөн хатгалга” гэж нэрлээд тус улс дахь Оросын элчин сайдын хэргийг түр хамаарагчид эсэргүүцэл илэрхийлснээ мэдээлжээ.

Эсэргүүцлийн мэдэгдэлдээ хилийн хөвүүр тэмдэглэгээнүүдийг буцааж усанд байрлуулахыг шаардсан байна.

Энэ долоо хоногийн эхээр ОХУ-ын батлан хамгаалах яам Балтийн тэнгис дэх усан хилийн шугамыг шинэчлэх тухай саналаа хэсэгхэн хугацаанд онлайн орчинд нийтэлсний дараа буцааж устгасан юм.

Энэхүү учир битүүлэг үйлдлийнхээ талаар Москвагийн эрх баригчид одоогоор ямар нэг тайлбар өгөөгүй байна.

 

Эх сурвалж: BBC