3,000 орчим хүүхдэд “Хүн байх эрхэм чанар”, “Цахим дээрэлхэлт” сэдвээр лекц танилцуулга хийжээ
Хууль зүй, дотоод хэргийн яамнаас “Бие биеэ хайрладаг хүүхэд” сургалтын гарын авлагыг боловсруулан 2026 оны зуны хугацаанд зусланд амрагч хүүхдүүдэд хүргэх ажлыг санаачлан хэрэгжүүлсэн байна.
Энэхүү гарын авлага нь хүүхэд, өсвөр үеийнхний дундах дээрэлхэлт, гадуурхалт, гэмт хэрэгт өртөж буй байдлыг бууруулах зорилгоор сургалт, сурталчилгаа, нөлөөллийн ажлыг эрчимжүүлэхэд дэмжлэг үзүүлэхийн тулд санаачилсан ажил аж.
ОУХНЦ-ын арга зүйн багийн арга зүйчид энэхүү гарын авлагад орсон дасгал ажлуудыг амрагчдад хэрхэн хүргэх талаарх арга зүйн сургалтыг 12 бүлгийн удирдагчдад зохион байгуулж ажилласан байна.
Бүлгийн удирдагчид 2026 оны зуны 5-9 дүгээр ээлжүүдэд долоодугаар сарын 15-наас наймдугаар сарын 15-ны хооронд амарсан 3,000 орчим амрагчдад гарын авлагын агуулгад орсон “Хүн байх эрхэм чанар”, “Дээрэлхдэггүй, айдасгүй, бие биеэ дэмждэг хүүхдүүд”, “Цахим дээрэлхэлт” сэдвийн хүрээнд хоёр удаагийн бүлгийн ажил, нэг удаагийн өртөөчилсөн ажил, хоёр удаагийн лекц таниулгыг зохион байгуулжээ.
Мөн “Найз байя” зургийн хүрээнд зургаа даруулан, “Дээрэлхэлтгүй байх” уриалгыг найзууддаа хүргэх аяныг ч хэрэгжүүлсэн байна.
Улмаар “Хорт зуршил” агуулгыг өртөөчилсөн байдлаар, мэргэжлийн байгууллага, мэргэжилтнүүдтэй хамтран зохион байгуулсан аж.
Тодруулбал Нийгмийн эрүүл мэндийн үндэсний төвийн хорт зуршлын хэлтсийн мэргэжилтэн Ш.Батсуурь “Электрон тамхины хор уршиг” өртөөг, ЦЕГ-ын Хүүхдийг гэмт хэргээс урьдчилан сэргийлэх хэлтсийн дарга Д.Будзаан “Өөрийгөө хамгаалъя” өртөөг, СХД-ийн Цагдаагийн гуравдугаар хэлтсийн ажилтнууд “Зөв дадал” өртөөг хамтран зохион байгуулж ажилласныг Хууль зүй, дотоод хэргийн яамнаас мэдээллээ.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
