Чингис хаан Үндэсний музейгээр нэг жилийн хугацаанд нийт 247 мянган үзэгч үйлчлүүлжээ

Чингис хаан үндэсний музейн үзэгч олондоо үйлчилж эхлээд нэг жил болжээ.

Энэ хугацаанд Чингис хаан Үндэсний музейгээр нийт 247 мянган үзэгч үйлчлүүлж, 53 мянган үзэгч тайлбарт үйлчилгээнд хамрагдсан байна. Нийт үзэгчдийн 40 орчим хувь нь сургуулийн өмнөх боловсролын байгууллагын болон ерөнхий боловсролын сургуулийн сурагч байв. Эдгээр хүүхдээс 9,300 гаруй нь “Музейд суралцахуй” боловсролын хөтөлбөрт хамрагджээ.

Чингис хаан Үндэсний музей нь байгуулагдсан цагаас эхлэн эрдэм шинжилгээ, судалгаа, соёл, аялал жуулчлалын томоохон цөм болж “Олон улсын монголч эрдэмтдийн XII их хурал” зэрэг өргөн цар хүрээтэй томоохон 200 гаруй арга хэмжээг зохион байгуулсан байна. 

Музейн хийж хэрэгжүүлсэн ажлууд: 

• Монгол Улсын Засгийн газар, Соёлын яамнаас орон даяар зохион байгуулсан “Соёлын сэргэлт-2023” аяны хүрээнд Төв аймгийн 27 сумдад тус аяныг хэрэгжүүлсэн.
• Чингис хаан Үндэсний музей нь “Эзэнт гүрний өв соёл” төслийн хүрээнд Сүхбаатар аймгийн Түвшинширээ сумын нутаг Оорцог овоо уул зэрэг дурсгалт газруудад археологийн малтлага судалгаа явуулж, олдвор, эд өлгийн зүйлсээр музейн сан хөмрөгийг баяжуулан, ерөнхий бүртгэлийн Register программд бүртгэлд оруулж, цэвэрлэгээ, бэхжүүлэлт, сэргээн засварлах ажлыг хийж, түүх соёлын үнэ цэнтэй олдворуудыг музейн үзмэрт дэглэсэн.
• Үзэгч, олон нийтэд зориулан байнгын үзүүлэнгийн танхимуудад үйлчлэхээс гадна гадаад, дотоодын 18 тусгай үзэсгэлэнг дэглэж, зохион байгуулсан.
• Нийт үзмэрийн 30 хувьд QR, AR, интерактив зэрэг дэвшилтэт технологийг нэвтрүүлж, Гэрэгэ системийг төлбөр тооцоондоо ашиглаж эхэлсэн анхны музей болов.
• Соёлын бүтээлч үйлдвэрлэлийг хөгжүүлэх зорилгоор музейн брэнд бүтээгдэхүүнийг бий болгон, Монголын анхны музейн дэлгүүрийг нээн ажиллуулжээ.
• Музейн номын санг тохижуулан, эрдэм шинжилгээний ном, сэтгүүлүүдээр сан хөмрөгөө бүрдүүлэн баяжуулж, ангилан бүртгэж, музейн салбараас анх удаа КОХА системд нэвтрүүлэн, олон улсын нэгдсэн сүлжээнд оруулав.
• “Талын язгууртны өв: Хубилай хааны зуны нийслэл Шанду”, Чингис хаан Үндэсний музейн монгол, англи хөтөч ном зэрэг хэвлэмэл бүтээлүүдийг эрхлэн хэвлүүлж, Чингис хаан судлалын олон улсын холбоотой хамтран гадаад, дотоодын эрдэмтдийн цуврал лекцийг 8 удаа олон нийтэд нээлттэй зохион байгуулжээ.

Чингис хаан Үндэсний музейн удирдлага, хамт олон нэгдсэн зохион байгуулалт, хөдөлмөр зүтгэлээрээ манлайлан ажиллаж, "Тусгай хэрэгцээт иргэдэд тэгш хүртээмжтэй оны шилдэг бүтээн байгуулалт-2022" болон “Мөнгөн мод-2022” наадмын “Шилдэг архитектурын бүтээл”, “Соёлын өвийг сурталчилсан шилдэг бүтээл” шагналыг тус тус хүртээд байгаа юм байна. 

Тус музей нь нэг жилийн ойгоороо Франц улсын Нант хотын Бреттанийн Гүнгийн ордон буюу Түүхийн музейд ШУА-ийн Археологийн хүрээлэн, Хархорум музей, дэлхийн нэр хүнд бүхий Лувр (Louvre), Сэвр (Sevres), Азийн урлагийн Гимэй (Guimet), Брэнли (Quai Branly) музей болон Европын Холбооны улсын 20 музейн шилдэг үзмэрээс бүрдсэн "Чингис хаан: Монголчууд дэлхийг өөрчилсөн нь" үзэсгэлэнг зохион байгуулж байгаа аж.

Үзэсгэлэнгийн нээлт 2023 оны аравдугаар сарын 14-ний өдөр болох юм байна. 

Мөн, музейд эртний нийслэл Хархорум хотын Мөнгөн мод, Монголын төрт улсын түүхийг харуулсан угтах шатны ханын релиф, Эрдэнэ зуугийн гол зуугийн сүмийн хийцлэл, Виртуал 360 өрөөний тохижилт зэрэг томоохон бүтээн байгуулалт өрнүүлж байгаа тул үзэгчдийн аюулгүй байдал, тав тухыг хангах зорилгоор аравдугаар сарын 12-ноос эхлэн нэг сарын хугацаанд түр хаахаар шийдвэрлэсэн байна. 

Чингис хаан Үндэсний Музей арваннэгдүгээр сарын 14-ний өдөр буюу Чингис хааны мэндэлсэн өдөр олон нийтэд үйлчилж эхлэх аж.