Мексикийн цагдаа нар хүний биеийн хэсгүүд бүхий 45 уут олсноо мэдээлсэн байна

Мексикийн эрх баригчид тус улсын баруун бүсийн Халиско мужийн төв Гуадалахара хотын гадна орших жалганаас хүний биеийн хэсгүүд бүхий 45 уут олсноо өчигдөр зарлажээ.

Өнгөрсөн долоо хоногт сураггүй алга болсон дуудлагын төвийн долоон ажилтныг эрэн сурвалжлах явцдаа цагдаа нар эдгээрийг олсон юм байна.

Мөрдөгчид нийт хэдэн хүний цогцос олдсон, хохирогчид нь хэн байсан, ямар шалтгаанаар үхсэнийг тогтоохоор ажиллаж байгааг Халиско мужийн прокурорын газар мэдээлжээ.

Мексикийн засгийн газраас гаргасан тоо баримтаар тус улсад одоо сураггүй болсон 100,000 гаруй хүн эрэн сурвалжлагдаж байгаа юм.

Тэдний ихэнхийг зохион байгуулалттай гэмт хэргийн бүлгүүдийн хохирогчид гэж үздэг. Тэдгээрийн дөрөвний гурав нь эрэгтэй хүмүүс, таван хүн тутмын нэг нь алга болох үедээ 18 нас хүрээгүй байжээ.

Мексик бол хүн амины хэргийн тоогоор дэлхийд тэргүүлэгч улсуудын нэг юм. Сая цогцсууд олдсон Халиско муж нь Мексикийн хар тамхины гэмт хэргийн гол төв болдог. Одоо тус мужид Мексикийн хамгийн хүчирхэг картель болох Халискогийн Шинэ Үеийнхэн (CJNG) бүлэг үйл ажиллагаагаа явуулдаг юм.

Тус бүлгээс 2017 онд Нуэва Плаза хэмээх шинэ картель салж байгуулагдсан бөгөөд одоо тэдгээрийн хооронд цуст мөргөлдөөн үргэлжилж байгаа ажээ.

Эх сурвалж: BBC