Монголын тамирчид Пауэрлифтингийн ДАШТ-ээс 21 медаль хүртэж, багийн дүнгээр хоёрдугаар байрт шалгарчээ
Пауэрлифтингийн хэрэглэлтэй, хэрэглэлгүй хэвтээ шахалтын Дэлхийн Аварга Шалгаруулах Тэмцээн (ДАШТ)-ий талаар Монголын баг тамирчид Спортын төв ордонд хэвлэлийн хурал зохион байгууллаа.
Тус ДАШТ-д гаргасан амжилтын талаар Монголын Пауэрлифтингийн холбооны ерөнхий нарийн бичгийн дарга Б.Баттулга танилцуулав.
Тэрбээр "Пауэрлифтингийн хэрэглэлтэй, хэрэглэлгүй хэвтээ шахалтын ДАШТ бүх насны ангиллаар Өмнөд Африкийн Бүгд Найрамдах Улсын Сан сити хотод тавдугаар сарын 25-27-нд зохион байгуулагдсан.
Монголоос 28 тамирчин, багийн ахлагчаар н.Бархасбаатар, дасгалжуулагчаар Х.Энхбаатар гэсэн баг бүрэлдэхүүнтэйгээр оролцож таван алт, 10 мөнгө, зургаан хүрэл медаль хүртсэн. Таван алтан медаль хүртсэн тамирчид маань дэлхийн шилдэг хэвтээ шахагчийн цомыг авлаа. Үүнд:
- -93 кг жингийн ОУХМ Г.Оргилболд дэлхийн хошой аварга болов.
- Залуучуудын ангилалд Ч.Цэрэнбат анх удаа ДАШТ-д оролцож алтан медаль
- Өсвөр үеийн ангилалд Өвөрхангай аймгийн дунд сургуулийн сурагч Г.Сумьяасүрэн анх удаа оролцож Монголын анхны эмэгтэй дэлхийн аварга
- Мастер 2 ангилалд ахмад тамирчин Ц.Баярхүү түрүүлсэн
- Насанд хүрэгчдийн ангиллын -105 кг жингийн тамирчин Д.Түмэнжаргал дэлхийн аварга гэсэн бахдам сайхан амжилттай ирлээ.
Пауэрлифтингийн ДАШТ бол олимп гэсэн үг. Нийт 42 орны 600 гаруй тамирчид оролцсон. Олон насны ангиллаар зохион байгуулагддаг учраас өргөн цар хүрээг хамардаг. Шилдэг хэвтээ шахагчийн цом гэдэг нь тухайн ангилалд түрүүлсэн шилдгүүдээс гурван хүнд өгдөг. Харин манайхаас таван тамирчин шилдэг хэвтээ шахагчийн цом авсан.
Сан сити хот хүртэл маш олон цаг нисэж очсон. Монголоос Истанбул руу 10 цаг нисэж очоод, дараагийн нислэгээ 12 цаг хүлээсэн. Түүнээсээ Өмнөд Африкийн Бүгд Найрамдах Нэгдсэн Улсын Иохансбург хот руу 10 цаг ниссэн. Дараа нь Сан сити руу гурван цаг машинаар явж очсоноор тэмцээндээ оролцсон. Энэ удаагийн тэмцээнд дасгалжуулагчтай явсан учраас багийн дүнгээр хоёрдугаар байрт бичигдсэн амжилт гаргасан" хэмээн ярив.
Мөн Пауэрлифтингийн хэвтээ шахалтын төрлөөр анхны эмэгтэй дэлхийн аварга Г.Сумьяасүрэн "Өвөрхангай аймгийн Уянга сумаас ирж оролцоод ДАШТ-д түрүүлсэн. Пауэрлифтингээр хоёр дахь жилдээ хичээллэж байна. Өмнө нь чөлөөт бөхөөр барилддаг байхдаа 2022 оны улсын аваргад түрүүлснээр Пауэрлифтингийн спортоор хичээллэж эхэлсэн. Одоо бол "Могул" фитнест н.Цэлмэг багшийн удирдлага дор хичээллэж байгаа. Аавынхаа нэрийг дэлхийд гаргаж буйдаа бахархсан" хэмээн сэтгэгдлээ хуваалцлаа.
