Гэрэл зургийг MPA агентлагийн онцгой зөвшөөрөлтэйгөөр ашиглав

"Өргөө" амаржих газарт үүсээд буй асуудалтай холбоотойгоор тус эмнэлгийн үйлдвэрчний хорооноос өнөөдөр мэдээлэл хийлээ.

"Манай эмнэлгийн үйлдвэрчний хороонд ямар нэг санхүүгийн зөрчил доголдол огт байхгүй"

Энэ тухай "Өргөө" амаржих газрын үйлдвэрчний хороон дарга Д.Өнөржаргал хэлэхдээ “Өчигдөр Ж.Энхцэцэг дарга ажлаасаа чөлөөлөгдсөнтэй холбоотойгоор хамт олны нэр хүндэд халдаж, үйлдвэрчний хороон дарга намайг өчнөөн сая төгрөг идсэн мэтээр нийтийн сүлжээнд цацаж байгаатай холбоотой хариу тайлбар хийж байна.

Бид 2018 онд үйлдвэрчний эвлэлийн ажлыг авсан бөгөөд түүнээс хойш жил бүр ажилчдадаа тайлангаа нээлттэй тавьж ирсэн. Үйлдвэрчний эвлэлийн татварт ажилтны цалингийн 1 хувьтай тэнцэх хэмжээний мөнгийг авч, 70 хувийг нь ажилчдынхаа тав тухтай байдлыг хангах, ахуйн нөхцөлийг сайжруулах, гачигдалтай ажилтандаа мөнгөн тусламж үзүүлэх зэргээр ашиглаж, 30 хувийг нь Монголын Эрүүл мэндийн ажилчдын үйлдвэрчдийн холбоонд татвар болгож төлдөг.

Энэ мөнгийг зарцуулахад би ганцаар шийдвэр гаргадаггүй буюу хамт олноос ирсэн саналыг үндэслэн төлөвлөгөө гаргаад тэргүүлэгчдийн багаар хэлэлцээд зарцуулдаг. Мөн тухайн татварыг юунд зарцуулсан талаарх шалгалт жил бүр хийддэг, улирал бүр бид Эрүүл мэндийн ажилчдын үйлдвэрчний эвлэлийн холбоонд тайлангаа өгдөг учраас ямар нэг санхүүгийн зөрчил доголдол огт байхгүйг нүүр бардам хэлье” гэв.

"Солигдож ирсэн хүмүүс ажлаа мэдэхгүйн улмаас ажилчдын амралт олгох тушаалыг гаргадаггүй, ажилчид цалингаа авч чаддаггүй нөхцөл үүссэн"

 

Гэрэл зургийг MPA агентлагийн онцгой зөвшөөрөлтэйгөөр ашиглав

Үргэлжлүүлэн “2021 онд манайх 487 ажилтантай байсан. Харин өнөөдрийн байдлаар 162 ажилтан ажлаас гарсан байна. Тэдгээрийн судалгаагаар 10 нь дикритээ авсан, 10 нь тэтгэвэртээ гарсан бол хоёр нь нас барсан байна.

Түүнчлэн манай эмнэлгийн боловсон хүчний бодлого алдагдсантай холбоотойгоор боловсон хүчний газар буюу хүний нөөцөд ажиллаж байсан ажилчид маань ч дарамтын улмаас гарсан. Оронд нь ирсэн хүмүүс ажлаа мэдэхгүй тул ажилчдын амралт олгох тушаалыг гаргадаггүй. Үүний улмаас эмч, ажилчид цалингаа авч чаддаггүй нөхцөл өнгөрсөн саруудад үүссэн. Цалингаа авч чадахгүй байгаа ажилтанд Ерөнхий нягтлан нь “Надаас зээлж болно” гэж хүртэл хэлж байгаа юм. Байгууллагад ийм зүйл байж болохгүй гэж үзэж байна.

Мөн өөрийнхөө хүсэлтээр гарсан ажилчид ажлаас гарсан хойноо тодорхой хугацаанд тэтгэмж авдаг. Гэтэл тухайн хугацаанд нь тодорхойлолтыг нь гаргаж өгөөгүйн улмаас ажлаас гарсан ч маш олон хүн тэтгэмжээ авч чадаагүй хохирсон.

Жишээ хэлэхэд, манай эмнэлгийн зөвхөн захиргаанд өмнө нь нийт 37 хүн ажиллаж байснаас дөрөв нь л үлдсэн. Бусад нь бүгд солигдсон. Дандаа өөрийнх нь хүсэлтээр гаргасан байгаа юм. Эмнэлгийн удирдлага зохион байгуулалт ингэж алдагдсантай холбоотой манай тусламж үйлчилгээ доголдож эхэлсэн.

Мөн Ж.Энхцэцэг захирал өөрийгөө төрөлтийн өвдөлт намдаалтаас мөнгө авдаг байсныг зогсоосон гэсэн. Үгүй. Бид төрөлтийн өвдөлт намдаалт гэдгийг анх 2018 онд манай байгууллага санаачилж хэрэгжүүлсэн бөгөөд түүнийг хийдэг гуурс нь өндөр өртөгтэй учраас өөрсдийн мөнгөөр үйлчлүүлэгчид авч өгч чадахгүй, оруулж ирдэг байгууллага руу нь захиж тэр газарт нь төлбөр төлж хийлгүүлдэг байсан. Харин үүнийг Ж.Энхцэцэг биш, н.Дүүрэнбилэг гэх хүн эмнэлгийн дарга байхдаа арилгасан юм.

"Өмнө нь 4-5 ЭХО-ны эмч байсныг дарамталсаар байгаад ажлаас нь гаргачихсан"

Мөн Ж.Энхцэцэг даргаас хэн гэдэг эмч архи уучхаад хагалгаа хийх гээд байсан болон нярай үзэх гээд зогсож байсныг асуумаар байна. Ийм хүнд нөхцөлтэй ажилладаг ажилчид дээрээс нь нийгмийн дунд нэр хүндээ ингэж бууруулахыг зөвшөөрөхгүй.

Өнөөдөр манай эмнэлэг нэг ч ЭХО-ны эмчгүй, нарийн мэргэжлийн ганцхан дотрын эмчтэй ажиллаж байна. Тэр эмч нь үнэхээр ядартлаа ачаалалтай ажиллаж байгаа. Өмнө нь 4-5 ЭХО-ны эмч байсныг дарамталсаар байгаад гаргачихсан.

Агтлагдсан байсан рентгений аппаратыг манай хуучин инженер харьяа засварын байгууллагад засуулахаар өгснийх нь төлөө нэг ч үг асуулгүйгээр уйлуулж зогсоож байгаад ажлаас нь халж л байсан. Тэр инженер чадвартай учраас одоо өөр газар инженерийн ажлаа хийгээд явж байгаа.

Хувийн эмнэлэгтэй, хувийн эмнэлэг рүүгээ үйлчлүүлэгчийг чирээд явдаг гэж хэлснийг мөн няцааж байна. Мөн Ж.Энхцэцэг даргын хэлсэн эмч, эмнэлгийн ажилчдын мэдлэг олгодог, шалгалт явуулдаг болсон, ахмад үеэс залуу үеэс бэлдэх ажлыг суулгасан гэдэг нь аль эртнээс зүгширсэн ажил байсан.

Ер нь удирдлагын түвшинд ажилд орсон хүмүүс ажилчдыг дарамталж, тэгш бусаар харьцаж байгаа. Энэ бол багаар ажиллах зарчим биш, удирдагчдын манлайлал биш.

Дотоод хяналтын ажилтнаа тасгуудаар явуулж, үйлчлүүлэгчээс санал аваад, түүнийг нь гомдол болгож хувиргаад ажилтныг ажлаас халах үндэслэл болгож байсан тохиолдол ч бий. Нөгөө үйлчлүүлэгч нь хүртэл өөрөө гомдол гаргаагүй байхад яагаад тэр ажилтныг цагдаагийн байгууллагад өгснийг гайхаж байсан. Энэ бол байгууллагын түүхэнд байгаагүй буюу байгууллагын дарга нь ажилтнаа цагдаад өгсөн анхны тохиолдол.

Эмч нар харьяаллын бус хүмүүсээс хувьдаа мөнгө авдаг байгаагүй. Өмнө нь харьяаллын бус хүмүүс манайд ирж төрөх хүсэлт гаргавал тэрийг нь бид аваад аж ахуйдаа зарцуулах асуудал байсан. Одоо тийм асуудал байхгүй" гэлээ.

"Удирдах албан тушаалтнуудыг халж, солих нь доод ажилтнуудад илүү дарамт болж ирж байна"

Эмнэлгийн ажилчдын төлөөлөл “Би энэ байгууллагад ажиллаад таван жил болж байна. Байгууллагын албан тушаалтнуудыг халж, солих асуудал доод ажилтнууд болох эмч, сувилагчдад илүү дарамт болж ирж байна. Сүүлд долдугаар сарын 23-ны үед шинэ орж ирсэн хуулийн зөвлөх гэх хүн нь биднийг хурал дээр бараг хулгайч нар гэх маягаар шахаанд оруулж ярьж байсан тохиолдол бий” гэв.

Ж.Энхцэцэг: Би энэ албан тушаалтай зууралдахгүй. Гэхдээ үйл ажиллагааг доголдуулсан хүмүүс цаанаа үлдэж байгаад харамсаж байна

Ташрамд дурдахад, "Өргөө" амаржих газрын дарга Ж.Энхцэцэг өчигдөр ажлаасаа чөлөөлөгдсөнийхөө дараа "Би ямар ч эхийг ялгаварлахгүй, хохироохгүйн тулд ажилдаа хариуцлагагүй, сэтгэлгүй хандсан ажилчдад л шаардлага тавьсан. Энэ шаардлагыг дарамт гэж дийлэнх нь үзэж байна.

Миний тавьсан шаардлага бол согтуу эмчээр нярай хүүхдийг үзүүлэхгүй, архи уусан эмчийг хагалгаанд оруулахгүй тухай байсан. Мөн эмнэлгийн тусламж үйлчилгээний чанар, аюулгүй байдал алдагдсанаар ураг, нярай эндэж хохироход хүргэсэн шалтгааныг тодорхойлон хийх арга хэмжээг зохион байгуулдаггүй, хүмүүст хүрч үйлчилдэггүй хариуцлагагүй ажилтан болон дарга нар л шаардлага тавьсан.

Түүнчлэн харьяаллын бус гэх шалтгаанаар төрөх эхчүүдээс авч байсан 300,000 төгрөг олон жил авч байсныг болиулсан. Улсын эмнэлэгт үнэ төлбөргүй үйлчилгээ авахаар ирсэн үйлчлүүлэгчдийг чирэгдүүлж, хувийн эмнэлэг рүүгээ илгээж, төлбөр авдаг байдлыг ч зогсоосон. Үйлдвэрчний эвлэлийг ахалж байгаа хүн үйлдвэрчний эвлэлээрээ бамбай барьчих шиг боллоо.

Үйлдвэрчний эвлэл гэдэг бол байгууллагын ажилтныг удирдлагатай холбох үүрэг гүйцэтгэж, холбоо харилцааг улам бэхжүүлж ажиллах ёстой. Гэтэл тэд ажилчид болон удирдлагын хооронд самарч хутгаад ажилчид, удирдлагын хооронд жүжиг тоглоод явж байсан хүмүүс ямар ч баримтгүйгээр хэвлэлийн хурал хийсэн.

Би үйлдвэрчний эвлэлийн хороон даргаас ажилчдаас дөрвөн жилд хураасан 350 сая гаруй төгрөгийг юунд зарцуулснаа тайлагнахыг шаардсан. Учир нь ямар ч и-баримт байхгүй, хэнд зарцуулсан нь байхгүй байна. Мөн ЭМЯ-ны Ёс зүйн хорооноос хийсэн шалгалтын дүгнэлтийг өөрөө мэдээгүй байхад өөр хүмүүсийн гар дээр очсон байсныг би гайхаж байна.

Улсын ажлыг өгдөг, авдаг тул би энэ албан тушаалтай зууралдахгүй. Гэхдээ эмнэлгийн үйл ажиллагааг доголдуулсан хүмүүс нь цаанаа үлдэж байгаад харамсаж байна” хэмээн хэвлэлд ярьсан юм.