• 12 сарын 25, Лхагва
|
Уншиж байна ...
Зураг
Зураг
ХУУЧИРСАН МЭДЭЭ: 2022/05/03-НД НИЙТЛЭГДСЭН

Б.Өнөрбилэг: Хүүхдийн шүдийг найман нас хүртэл өөрөөр нь битгий угаалга гэж зөвлөдөг

П.Сайнжаргал, IKON.MN
2022 оны 5 сарын 3
iKon.MN
Зураг зураг
Гэрэл зургийг MPA агентлагийн онцгой зөвшөөрөлтэйгөөр ашиглав

Хүүхдийн шүд, амны хөндийн өвчний урьдчилан сэргийлэлтийн талаарх эмчийн зөвлөгөөг хүргэе.

ЭМЯ-ны дэргэдэх Нүүр ам судлалын салбар зөвлөлийн гишүүн, клиникийн профессор Б.Өнөрбилэг "Хүүхдийн шүдийг найман нас хүртэл өөрөөр нь битгий угаалга. Эцэг эхчүүд өөрсдөө хүүхдийнхээ шүдийг гардаж угаах нь илүү үр дүнтэй.Заримдаа томчууд ч шүдээ дутуу угаах тохиолдол байдаг. Тэгэхээр хүүхдүүд бүр ч чадахгүй шүү дээ.

Өвөр дээрээ суулгаж байгаад хүүхдийнхээ шүдийг угаадаг япончуудын арга бий. Миний хувьд япон ээжийн аргаар хүүхдийнхээ шүдийг зургаан нас хүртэл угаасан. Хамгийн гол нь хүүхдээ уйлахаас төвөгшөөлгүй, тогтмол угаах хэрэгтэй. Ингэснээр хүүхдийн шүд цоорлоос сэргийлэх боломжтой. Хүүхдийн шүд цоорлын 70-80 хувь нь эцэг эх, асран хамгаалагчдаас хамаардаг" хэмээн хэллээ. 

Тэрбээр амны хөндийн өвчлөлийн зарим тоон мэдээллийг дурдсан юм. Тодруулбал, 

1989, 1994 онд 0-12 насны хүүхдүүдийн шүд цоорох өвчний тархалт 90-ээс дээш хувьтай байжээ. Гэтэл саяхны түүвэр судалгаагаар хүүхдийн шүдний өвчлөл 86-100 хувь өссөн дүнтэй байна.
Шүд цоорох өвчний эрчим гэж бий. Өөрөөр хэлбэл, нэг хүүхдийн аманд хэдэн шүд цоорч байгаа гэдгээр эрчмийг тодорхойлдог. Тодруулбал, 1989, 1996, 2007 оны байдлаар 3.6-4.8 эрчмийн үзүүлэлт байсан. Гэтэл одоо эмзэг бүлгийнхэн дунд 7-8 болж эрчим нэмэгджээ.
Сүүлийн 30 жилийн хугацаанд хүнсний бүтэц эрс өөрчлөгдлөө. Хагас боловсруулсан, жигнэсэн, хуурсан, нялцгай буюу ихэвчлэн зажлуургүй бүтэцтэй болоод байна. Тиймээс хоол, хүнсэндээ анхаарах хэрэгтэй.
Зажлуур их байх тусам булчин хөгжинө. Зажлуурын булчин нь өөрөө ясаа тэжээдэг. Булчин сайн ажиллавал дагаад яс сайжирна, илүү бат бөх болно гэсэн үг.