Уншиж байна ...
Зураг
Зураг
ХУУЧИРСАН МЭДЭЭ: 2020/11/25-НД НИЙТЛЭГДСЭН

Америк дэлхийн тавцанд буцаж ирснийг Байден зарлалаа

С.Мөнхцэцэг, ikon.mn
2020 оны 11 сарын 25
iKon.MN
Зураг зураг

АНУ-ын ерөнхийлөгчөөр сонгогдоод буй Жо Байден өөрийн засгийн газрын зургаан албан тушаалд ямар хүмүүсийг томилж байгаагаа өчигдөр буюу Мягмар гарагт зарлажээ.

Энэ үеэр тэр дэлхийн улс төрийн тавцанд “Америк буцаж ирсэн”-ийг зарлаад Европ, Азид холбоотны харилцаагаа дахин сэргээхээ амласан байна.

Өөрөөр хэлбэл одоогийн ерөнхийлөгч Дональд Трампын “Америк нэгдүгээрт” бодлогоос ухарч, дэлхийн тэргүүлэгч гүрний байр сууриа сэргээхээр болжээ.

Номхон далай, Атлантын далайд төдийгүй дэлхий дахинд тэргүүлэх үүрэг гүйцэтгэж ирсэн АНУ-ын түүхэн байр суурь үгүйлэгдэж байгааг өөртэй нь ярьсан улс орнуудын удирдагчид илэрхийлснийг Байден энэ үеэр хэлсэн юм.

Байдены зарласан зургаан албан тушаалтан нь:

  • Төрийн нарийн бичгийн дарга Энтони Блинкен
  • Уур амьсгалын асуудал хариуцсан тусгай элч Жон Керри
  • Үндэсний тагнуулын газрын захирал Аврил Хэйнес
  • Дотоод хэргийн сайд Алехандро Майорка
  • Цагаан ордны үндэсний аюулгүй байдлын зөвлөх Жэйк Суливан
  • НҮБ-д суух АНУ-ын элчин сайд Линда Томас Гринфелд нар байв.

Үндэсний тагнуулын газрын захирлаар анх удаа эмэгтэй хүн томилогдох гэж байгаа бол дотоод хэргийн сайдаар анх удаа латин гаралтай хүн томилогдох гэж байна.

Удтал эсэргүүцсэний эцэст саяхан Дональд Трамп эрх мэдэл шилжүүлэх ажлыг эхлүүлэхийг зөвшөөрсөн юм. Одооноос эхлээд Жо Байден АНУ-ын ерөнхийлөгчид өгдөг өдөр тутмын тагнуулын илтгэлийг авах эрхтэй болж байна. Мөн Вашингтоны засаг захиргааны гол албан тушаалтнуудтай шууд харилцах, нэгдүгээр сарын 20-нд болох тангаргын ёслолын бэлтгэлд зориулж олон саяын төсвийг зарцуулах эрхтэй болжээ.

Гэсэн хэдий ч Дональд Трамп сонгуулийн үр дүнг хүлээн зөвшөөрөлгүй, шүүх дээр тэмцлээ үргэлжлүүлсээр байна.

Өчигдөр сонгуулийн үр дүнд чухал нөлөөтэй мужуудын нэг Пенсильвани ялагчаар Жо Байденыг эцэслэн баталсан юм. Өмнөх өдөр нь Мичиган мужийн захиргаа бас ийм шийдвэр гаргаж байв.

 

Эх сурвалж: BBC