Монгол Улс "Airbus EC-145 T-1" загварын гурван нисдэг тэрэгтэй болно

Онцгой байдлын ерөнхий газар Бүгд Найрамдах Франц Улсын Иргэний аюулгүй байдал, гамшгийн удирдлагын ерөнхий газартай хамтран “Монгол Улсын Онцгой байдлын байгууллагад агаараас аврах ажиллагаа явуулах нэгж байгуулах, нисдэг тэрэг, гал унтраах тусгай зориулалтын автомашин нийлүүлэх төсөл”-ийг хэрэгжүүлэхээр 2017 оноос хойш ажиллаж байна.

Тус төслийг хэрэгжүүлэхээр санхүүгийн зээлийн гэрээнд Сангийн сайд Ч.Хүрэлбаатар, Франц Улсаас Монгол Улсад суугаа онц бөгөөд бүрэн эрхт Элчин сайд Филипп Мэрлин нар өнөөдөр Төрийн ордонд гарын үсэг зурлаа.

 

 

Нисэх төхөөрөмжийг  ой, хээрийн гал түймэр унтраах, түймрийн голомтод шуурхай бүлэг илгээх, иргэд төөрөх, сураггүй болох үед агаараас эрэн хайх, аврах ажиллагаа явуулах, үер, уснаас болон өндөр барилга, байгууламжаас нэрвэгдэгчдийг аврах, авто болон үйлдвэрийн ослоос хүнд бэртэж гэмтсэн нэрвэгдэгчийг болоод ослоос үүдэлтэй өвчтөний хүндрэлийн үед эмнэлгийн байгууллагад яаралтай тээвэрлэн хүргэх зэргээр ашиглах юм.  

Мөн энэхүү төсөл хэрэгжснээр хэт хүйтний нөхцөлд гал түймэр унтраах, нефтийн бүтээгдэхүүн түүнийг хадгалдаг агуулах болон онц чухал обьектын гал түймэр унтраах 42 нэгж тусгай зориулалтын шинэ автомашин нийлүүлэгдэнэ гэж Онцгой байдлын ерөнхий газраас мэдээллээ.