Зарим аймаг цэцэрлэг, сургуулийн ИЛҮҮДЭЛТЭЙ байна
Улсын хэмжээнд 2018-2019 оны хичээлийн жилд бүх шатны сургуульд сурагчид 1.0 сая, цэцэрлэгт хүмүүжиж байгаа хүүхдүүдийн тоо 261,300 болж нэмэгдсэн байна. Өмнөх хичээлийн жилтэй харьцуулахад сургуулийн тоо таваар нэмэгдэж, суралцагчдын тоо 20.4 мянгаар өсжээ. Нийт суралцагчдын 55.1% нь 1-5 дугаар ангид суралцаж байна. Харин цэцэрлэгийн тоо 19, цэцэрлэгийн бүлэг 95-аар нэмэгдсэнээр хамрагдах хүүхдүүдийн тоо 4,600-аар өсжээ.
Гэвч сургуулийн өмнөх насны буюу ирээдүйд сургуульд шилжин сурах хүүхдүүдийн тоо, хүн амын өсөлтийг харгалзалгүйгээр орон нутагт бүтээн байгуулалт хийж буй нэрээр, шаардлагагүй байршилд цэцэрлэг, сургууль барьсан нь Үндэсний статистикийн хорооноос хийсэн уг судалгааны явцад ажиглагдсан байна. Тухайлбал, хойд болон зүүн аймгуудад сургуулийн илүүдэл байгааг ҮСХ-ны статистикч Ю.Батзориг дурдлаа. Өөрөөр хэлбэл, бүрэн ашиглах хэмжээний хүүхдийн тоо байхгүй гэсэн үг. Харин эсрэгээрээ Улаанбаатар хотод сургууь, цэцэрлэгийн хүртээмж хангалтгүй хэвээр байгаа юм.
Ерөнхий боловсролын сургуулийн нэгдүгээр ангид 2018-2019 оны хичээлийн жилд 72.2 мянган хүүхэд элсэн орсон нь өмнөх оныхоос 6.3%-аар өссөн дүн. Мөн дотуур байранд амьдардаг ерөнхий боловсролын сургуулийн сурагчдын тоо 34.7 мянга байна. Нийт
- 1,435 цэцэрлэгт 261.3 мянган хүүхэд
- 803 сургуульд 593.2 мянган сурагч
- 94 их, дээд сургуульд 157.6 мянган оюунтан суралцаж байгаа бөгөөд
- Мэргэжлийн боловсрол сургалтын 86 байгууллага үйл ажиллагаа явуулж байна.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
9 СЭТГЭГДЭЛТЭЙ
|
