“Нууц” дансыг УИХ-ын гишүүн С.Одонтуяа эсэргүүцэж байна
Оффшор данстай холбоотой мэдээллүүдийг Олон улсын эрэн сурвалжлах сэтгүүлчдийн нийгэмлэгээс задлан нийтэд ил болголоо.
Монголын улс төрчид, тэдний үр хүүхдүүдтэй холбоотой оффшор данснууд ч эхнээсээ илэрч дуулиан дагуулаад байна. Төрийн өндөрлөгүүд болоод хуулийн байгууллагууд уг асуудалд төдийлөн анхаарал тавихгүй байгаа нь Монгол Улсын үндэсний аюулгүй байдал, төрийн хар хайрцгийн бодлогод сөргөөр нөлөөлж болох юм.
Харин улс төрчид болоод төрийн албан тушаалтнуудыг оффшор дансгүй байхад уриалсан, уриалсаар байгаа ганц хүнийг УИХ-ын гишүүн С.Одонтуяа гэхэд хилсдэхгүй байх. Түүний 2015 оны арванхоёрдугаар сард бичиж байсан “Таныг Монголоосоо дайжихгүй гэдэгт итгэхийг хүсч байна” нэртэй нийтлэл сайт, сонинуудад нийтлэгдсэн өдрөөсөө л олны анхаарлыг ихэд татсан.
Зарим нэг нь энэ асуудлыг ул суурьтай хөндөж, зоригтой эсэргүүцэж байгаад нь талархалтай хандаж байгаа бол нөгөө хэсэг нь “сонгуулийн шоу” хэмээн иргэдийн анхаарлыг өөр зүгт санаатайгаар чиглүүлж байх шиг.
Үнэхээр ард түмний татварын мөнгөөр цалинждаг, ард түмний итгэлийг хүлээн тэдний төлөөлөл болж ажиллах учиртай төрийн түшээд, улс төрчдийн “нууц” дансны асуудлыг нийтэд ил болгох, хариуцлага тооцох талаар дорвитой арга хэмжээ авах цаг болоод байна.
УИХ-ын гишүүн С.Одонтуяа энэ талаар зоригтой дуугарч эхэлсэн нь удахгүй улстөрчдийн “нууц” дансны эсрэг шинэ хууль гарахын дохио биз ээ.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
