“Coal Mongolia-2014”: Нэг тэрбум тонн нүүрс Хятадад нийлүүлэхээр тохиролцсон

Нүүрсний салбарт хөрөнгө оруулагчдын дөрөв дэх удаагийн олон улсын чуулга уулзалт “Coal Mongolia-2014” "SS club"-т эхэллээ. Уулзалт хоёр өдөр үргэлжилнэ.

Чуулга уулзалтад найман орны 1000 гаруй төлөөлөгчид оролцож байна. Чуулга уулзалт нь дан ганц асуудал хэлэлцэхээс бус уул уурхайн салбарт ханган нийлүүлэгч, үйлчилгээ үзүүлдэг байгууллагуудын үзэсгэлэнг гаргадаг онцлогтой. Энэ удаагийн үзэсгэлэнд 55 компани үзэсгэлэн гаргаж байгаа бөгөөд БНХАУ, ХБНГУ, БНСУ-аас дэлхийд нэр хүндтэй уул уурхайн салбарын компаниуд хүрэлцэн ирж оролцож байна.

Чуулганаар хэлэлцэх асуудал: Энэ удаагийн чуулга уулзалтаар үндсэн 6 сэдвийн хүрээнд хэлэлцэж, чуулах болно.

1. Нүүрсний аж үйлдвэрлэлийг хөгжүүлэх стратегийн чиг хандлага,
2. Нүүрсний зах зээл ба Монголын өрсөлдөх чадвар, төслийн санхүүжилт,
3. Нэмүү өртөг шингэсэн аж үйлдвэрлэл - нүүрс, занарын гүн боловсруулалт,
4. Коксжих нүүрс - хөрөнгө оруулалтын төслүүд, техник технологи
5. Эрчим хүчний нүүрс -  хөрөнгө оруулалтын төслүүд, техник технологи
6. Нүүрсний салбарын өрсөлдөх чадварыг нэмэгдүүлэх нь – төр, хувийн хэвшлийн нээлттэй хэлэлцүүлэг гэсэн үндсэн хэсгүүдээс бүрдэж байна.

“Coal Mongolia-2014” чуулганы нээлтэд Ерөнхий сайд Н.Алтанхуяг үг хэллээ. Засгийн газрын тэргүүний хэлсэн үгийг онцлон хүргэе.

Монгол Улсын нийт экспортын дөрөвний нэг хувийг эзэлдэг нүүрс манай эдийн засгийн чухал салбар юм. Өнгөрсөн онд манай улс 18 сая тонн нүүрс экспортолсон бол энэ жил 34 сая тоннд хүргэхээр зорьж байна.

Биднийг том зорилт, том ажлууд хүлээж байна. Ихээхэн хэмжээний хөрөнгө оруулалт шингээх боломжтой нүүрсний салбарт манай улс ирэх жилүүдэд хэд хэдэн том төсөл хэрэгжүүлнэ гэдгийг Ерөнхий сайд онцоллоо

Тэрбээр өнгөрсөн оны сүүлчээр БНХАУ-д хийсэн айлчлалынхаа үеэр нүүрс боловсруулалт, экспортын чиглэлээр хоёр том хэлэлцээр хийж, албажуулсан юм.

Хийн түлшээр дотоодын хэрэгцээг хангаад зогсохгүй Хятадын зах зээлд борлуулахаар зорьж байна.

Мөн цааш нь хэлэхдээ, 20 жилийн хугацаанд Монгол Улс нэг тэрбум тонн нүүрс Хятадад нийлүүлэхээр тохиролцсон нь ойрын ирээдүйд энэ салбарын хөгжлийг тодорхойлсон гол үзүүлэлт. Энэ хэмжээний нүүрсийг өнөөгийн ханшаар тооцож үзэхэд жилд 50 шахам тэрбум ам.долларын борлуулалт болно.

Бас нэг том төсөл бол Монголын хүрэн нүүрсний ордыг түшиглэн шатах хийн үйлдвэр байгуулах. 30 орчим тэрбум ам.долларын хөрөнгө оруулалт шаардсан энэ үйлдвэр жилдээ 50 сая тонн нүүрс боловсруулна. Үйлдвэрлэсэн хийн түлшээр дотоодын хэрэгцээг хангаад зогсохгүй Хятадын зах зээлд борлуулахаар зорьж байна. Нүүрснээс шингэн түлш гаргаж авах төсөл ч эхлээд байна.

Зөвхөн нүүрсэнд түшиглэсэн дээрх төслүүд Монгол Улсад эрчим хүчний шинэ эх үүсвэр бий болгох, үйлдвэрлэл хөгжүүлэх, ажлын байр нэмэх гээд нийгэм, эдийн засагт олон хэлбэрээр үр нөлөө өгнө гэв.

Бичлэг:

Чуулга уулзалтын зорилго:

“Coal Mongolia-2014”-ийг зохион байгуулах хорооны нарийн бичгийн дарга Б.Алтаншагайгийн хэлснээр хөрөнгө оруулалт татах, дэвшилтэт технологийг нэвтрүүлэх, өрсөл­дөх чадварыг нэмэгдүүлэх юм.

Тавигдах илтгэлүүд:

Чуулга уулзалтад 30 илтгэгч илтгэлээ тавих бөгөөд 6 модератор, 13 панелистууд оролцох юм. 

• Уул уурхайн сайд Д.Ганхуяг "Төрөөс эрдэс баялгийн салбарт баримтлах бодлого ба нүүрсний салбарыг хөгжүүлэх стратегийн чиг хандлага"
• Гадаад харилцааны сайд Л.Болд "Гадаадын хөрөнгө оруулалтын талаар Засгийн газрын баримтлах бодлого"
• Сангийн сайд Ч.Улаан "Улсын төсөвт нүүрсний салбарын үзүүлэх нөлөө, татварын орчин"
• Эдийн засгийн хөгжлийн дэд сайд О.Чулуунбат "Нүүрсний салбар дахь хөрөнгө оруулалт, худалдааны таатай орчинг бүрдүүлэх нь"
• Уул уурхайн дэд сайд О.Эрдэнэбулган "Монголын нүүрсний салбарын өрсөлдөх чадварыг нэмэгдүүлэхэд оролцох төрийн бодлого, дэмжлэг"
• Эрчим хүчний дэд сайд Д.Доржпүрэв "2014 онд Эрчим хүчний салбарт хийгдэхээр төлөвлөсөн ажлууд болон төрөөс баримталж буй бодлого"
• Монголын Уул Уурхайн корпораци”-ийн гүйцэтгэх захирал Г.Батцэнгэл "Монголын нүүрсний салбарын өнөөгийн нөхцөл байдал, тулгарч буй бэрхшээл ба шийдэх боломж"
• “МАК” компанийн төслийн удирдагч Ж.Золжаргал "Адуунчулууны цахилгаан станц, бензиний үйлдвэрийн төсөл"
• “Могул Пауэр” ХХК-ийн гүйцэтгэх захирал Ж.Эрдэмбилэг "Тэвшийн говь цахилгаан станцын төсөл"
• Хятадын “Фэнвэй Энержи Консалтинг” ХХК-ийн дэд ерөнхийлөгч Вэнлин Суэ "Хятадын коксжих нүүрсний өнөөгийн зах зээл, 2014 оны чиг хандлага"
• “Пийбоди Энержи”-гийн Худалдаа болон Азийн бүс хариуцсан ерөнхийлөгч Доктор Кристофер Хагедорн "Дэлхийн нүүрсний зах зээлийн 2014 оны төлөв байдал, цаашдын хандлага, Монгол Улсад үзүүлэх нөлөөлөл"
• “Эрдэнэс МГЛ”-ын гүйцэтгэх захирал "Нүүрсний салбар дахь төрийн өмчит компаниудын хөгжлийн чиг хандлага"
• “Багануур” ХК-ийн гүйцэтгэх захирал М.Отгонбаяр "Эрчим хүчний нүүрсний хэрэглээ, Багануурын уурхайн хүчин чадлын өргөтгөл"-ийн тухай илтгэлийг тавих юм.

Чуулганы модератор:

• “Пийбоди Энержи” компанийн Монгол, Энэтхэгийн хариуцсан ерөнхийлөгч Аршад Саейд, “Де факто” нэвтрүүлгийн зохиогч, эдийн засагч, нийтлэлч Д.Жаргалсайхан
• МҮОНТ-ийн ММ агентлагийн тоймч Р.Гандиймаа
• “Ийгл” телевизийн эдийн засгийн тоймч Ц.Ганзориг
• “Монголын бизнесийн зөвлөл” ТББ-ын гүйцэтгэх захирали Жим Двайер
• “Гложекс” ХХК-ийн ТУЗ-ын дарга Л.Наранбаатар нар оролцох юм.

Панелист:

• Эдийн засгийн хөгжлийн дэд сайд О.Чулуунбат
• Эрчим хүчний дэд сайд Д.Доржпүрэв
• ҮХААЯ-ны Хүнд үйлдвэрийн бодлогын хэрэгжилтийг зохицуулах газрын дарга Д.Ганболд
• УУЯ-ны Стартегийн бодлого, төлөвлөлтийн газрын дарга Ч.Отгочулуу
• УУЯ-ны Бодлогын хэрэгжилтийг зохицуулах газрын дарга Б.Батхүү
• УУЯ-ны Бодлогын хэлтсийн дарга Б.Нэргүй
• УУЯ-ны Түлшний бодлогын хэлтсийн дарга А.Эрдэнэпүрэв
• АМГ-ын Нүүрсний хэлтсийн дарга Б.Алтсүх
• “Эрдэнэс МГЛ” ХХК-ийн гүйцэтгэх захирал О.Сайнбуян
• МУУҮА-ийн ерөнхийлөгч Д.Дамба
• “Монголын бизнесийн зөвлөл” ТББ-ын гүйцэтгэх захирали Жим Двайер
• Төмөр замын инженерүүдийн холбооны ерөнхийлөгч Л.Пүрэвбаатар
• Монголын химич, химийн инженерүүдийн нэгдсэн холбооны гүйцэтгэх захирал Д.Үүрцайх зэрэг төлөөлөлүүд оролцож байна.

“Coal Mongolia-2014”-ийн эргэн тойрон дахь жиргээ