Өмнөд Солонгосын экс тэргүүн хатагтайн авлигын хэрэгтэй холбогдуулан Эв Нэгдлийн Сүмд тусгай ажиллагаа явуулжээ

Өмнөд Солонгосын экс тэргүүн хатагтай Ким Кон Хитэй холбоотой авлигын хэргийг шалгаж буй прокурорын баг өчигдөр буюу Баасан гарагт Мүүний шашин гэгддэг Эв Нэгдлийн Сүм шашны байгууллагын төв байранд тусгай ажиллагаа явуулжээ.

Тус байгууллагын удирдагчдын нэг Юн хэмээх хүний амины орон сууц байсан Сөүл хот дахь төв байранд уг ажиллагааг явуулсан байна.

Юн нь өөрийн байгууллагын бизнесийг дэмжүүлэхийн тулд 2022 оны дөрвөөс наймдугаар сарын хооронд тэргүүн хатагтайд Chanel брэндийн цүнх, үнэт эдлэл зэргийг бэлэглэсэн хэрэгт сэжиглэгдэж байгаа ажээ.

Энэ нь ерөнхийлөгч асан Юн Сүк Ёлын бүрэн эрхийн хугацаанд болсон үйл явдал юм байна.

 

Бэлгийг тэргүүн хатагтай асны ойрын хүн гэгдэж буй бөө Гон Жин зуучлан дамжуулсан хэрэгт шалгагдаж байгаа ажээ.

Тэргүүн хатагтайд өгсөн бэлгийнхээ хариуд Эв Нэгдлийн Сүм нь Камбож улсад хэрэгжиж буй Меконг Голын хөгжлийн төсөлд өөрийн оролцоог засгийн газраар дэмжүүлсэн гэгдэж байна.

Мөн ерөнхийлөгчийн тангараг өргөх ёслол зэрэг төрийн том арга хэмжээнүүдэд Эв Нэгдлийн Сүмийн төлөөлөгчид уригдахад тэргүүн хатагтай нөлөөлсөн тухай баримтыг YTN суваг мэдээлж байв.

Сэжигтэн Гон Жин үнэт эдлэлүүдийг Юнээс авснаа хүлээсэн ч цааш нь хэнд ч дамжуулаагүй, гээж үрэгдүүлсэн гэж мэдүүлж байгаа гэнэ.

Авлигад өгсөн гэгдэж буй эд зүйлсийг бас илрүүлээгүй байгааг албаны эх сурвалж мэдээлжээ.

Эх сурвалж: Yonhap News