Трампын тулган шаардалтад дүн шинжилгээ хийх шаардлагатайг Кремлийн хэвлэлийн алба мэдэгдэв

Даваа гарагт Вашингтон хотод НАТО-гийн тэргүүнтэй уулзсаныхаа дараа АНУ-ын ерөнхийлөгч Дональд Трамп эхлүүлсэн дайнаа дуусгах 50 хоногийн хугацааг ОХУ-ын эрх баригчдад өгч, биелүүлээгүй тохиолдолд 100 хувийн хоёрдогч татвараар шийтгэхээр сүрдүүлсэн билээ.

Өөрөөр хэлбэл Оростой худалдаа хийдэг улсуудын АНУ-д нийлүүлэх бараа бүтээгдэхүүнд 100 хувийн импортын татвар ногдуулахаа амласан юм.

Бас Европын санхүүжилтээр Украинд нийлүүлэх зэр зэвсгийн хэмжээгээ нэмэгдүүлэх төлөвлөгөөг энэ үеэр зарласан.

ОХУ-ын ерөнхийлөгч асан Дмитрий Медведев өчигдөр энэ талаар “Трамп дүр эсгэсэн тулган шаардалтыг Кремльд тавилаа. Дэлхий дагжин чичирч, үр дагаврыг нь хүлээж байна. Дайны хэнээтэй Европын урам хугарлаа. Орос үл ойшоож байна” гэж сошиал хуудсандаа бичжээ.

Харин Кремлийн хэвлэлийн алба үүнд илүү нухацтай хандаж байгаагаа илэрхийлсэн байна.

“АНУ-ын ерөнхийлөгчийн мэдэгдэл маш ноцтой байна. Мэдэгдлийн зарим хэсэг ерөнхийлөгч Путинд шууд чиглэжээ. Вашингтонд ярьсан зүйлд дүн шинжилгээ хийх хугацаа бидэнд хэрэгтэй нь мэдээж. Хэрвээ ерөнхийлөгч Путин шаардлагатай гэж үзвэл тодорхой тайлбар хийх болно” гэж Кремлийн хэвлэлийн албаны дарга Дмитрий Песков хэлжээ.

Украинд зэвсэг нийлүүлэх төлөвлөгөөг тэр “Вашингтон, НАТО-гийн орнууд, тэр дундаа Брюссельд гаргаж байгаа шийдвэрүүдийг Украины тал энх тайван тогтоох биш, дайныг үргэлжлүүлэх дохио гэж үзэж байгаа” гэж дүгнэсэн байна.

Орос улс Украинтай шууд яриа хэлэлцээ хийхэд бэлэн, дараагийн уулзалтын саналыг Киевээс хүлээж байгаагаа Песков бас мэдэгджээ.

АНУ-ын Сенатын 100 гишүүний 85 нь Оросын дайнд тусалж байгаа дэлхийн аль ч улс оронд 500 хүртэл хувийн татвар ногдуулах эрхийг ерөнхийлөгч Трампад олгох хуулийн төслийг хамтран санаачилсан байна.

Одоогоор Сенат дахь Бүгд Найрамдах намын бүлгийн удирдагчид энэхүү хуулийн төсөл дээр санал хураалт явуулах зөвшөөрлийг Трампаас хүлээж байгаа гэнэ.

Ийм хууль батлагдвал Оросын газрын тосны томоохон худалдан авагч Хятад, Энэтхэг улсуудад хүндээр тусах нь тодорхой.

Трамп өчигдөр BBC сувагт ярихдаа хэдийгээр Путиний хандлагад урам хугарсан ч түүнтэй харилцаагаа бүрмөсөн таслахыг хүсэхгүй, Украинд энхийн гэрээ байгуулах боломжид найдсан хэвээр байгаагаа мэдэгджээ.

Эх сурвалж: Reuters