“Мобиком Корпораци” ХХК ТОП-100 ААН-ийн 11 дүгээрт эрэмбэлэгдэн, харилцаа холбооны салбартаа дахин тэргүүллээ

Монгол Улсын Засгийн газар, Монголын Үндэсний Худалдаа Аж Үйлдвэрийн Танхимаас хамтран зохион байгуулдаг “ТОП-100 аж ахуйн нэгж”-ийн шалгаруулалтад “Мобиком Корпораци” ХХК 2024 онд 11 дүгээрт эрэмбэлэгдэж, харилцаа холбооны салбартаа дахин тэргүүллээ.

Энэ жил 24 дэх удаагаа зохион байгуулагдсан уг шалгаруулалт нь аж ахуйн нэгжүүдийн нийгэм, эдийн засагт оруулж буй бодит хувь нэмэр, тогтвортой үйл ажиллагаа, татвар төлөлт, хөрөнгийн хэмжээ зэрэг олон үзүүлэлтэд үндэслэн дүгнэдэг билээ.

2024 оны байдлаар “Мобиком Корпораци” ХХК:

• Борлуулалтын орлогоор 21 дүгээрт,
• Татвар төлөлт болон ашгийн хэмжээгээр 15 дугаарт,
• Даатгуулагчийн тоо болон хөрөнгийн хэмжээгээр 14 дүгээрт тус тус эрэмбэлэгджээ.

 

“Мобиком Корпораци” ХХК нь үүсгэн байгуулагдсан цагаасаа хойш Монгол Улсын дижитал шилжилт, харилцаа холбооны дэд бүтцийн хөгжилд манлайлан оролцож ирсэн бөгөөд өнөөдөр зөвхөн үйлчилгээний компани биш, технологийн шийдлээр дамжуулан хүртээмжтэй, тогтвортой ирээдүйг бүтээх зорилготой дижитал компани болон хөгжсөөр байна.

• Сүүлийн таван жилийн байдлаар бид 539.2 тэрбум төгрөгийн татварыг улсын төсөвт төвлөрүүлснээс 2024 онд 154.5 тэрбум төгрөгийг татварт төлсөн байна. 
• Өнгөрсөн жил хүүхэд бүрд бүтэн боловсрол уриан дор “Smart Education 4” төслөө хэрэгжүүлж, Улаанбаатар хот болон орон нутгийн нийт зургаан сургуулийн 12,000 сурагчийг технологийн дэвшлийг шингээсэн иж бүрэн дижитал танхимд хичээллэх боломжоор хангасан.  Түүнчлэн “Менторшип” хөтөлбөрөөр дамжуулан төсөлд хамрагдсан сургуулиудын 50 сурагчид салбар, салбарын 10 ментор таван сарын турш зөвлөж, мэдлэг, туршлага, ур чадвар, үнэт зүйлсээ хуваалцсан билээ.
• Бид байгууллагын бүх түвшинд жендерийн тэгш байдлыг хангаж, жил бүр хөгжлийн бэрхшээлтэй иргэд, тэтгэврийн насны иргэд, хүүхэд асарч буй ажилтнуудад хүртээмжтэй, уян хатан ажлын орчин бүрдүүлж, ажлын байр шинээр бий болгож байна. 

“Мобиком Корпораци” ХХК-ийн ололт амжилттай үргэлж хамт байж, дэмжин ажилладаг хэрэглэгч, харилцагч болон нийт хамт олондоо талархал илэрхийлье.