"ААН-үүдтэй зөвшилцөж Соёмботой хөшөөнөөс Ривер гарден хотхон хүртэл орц, гарц гаргана"
Хан-Уул дүүргийн 15 дугаар хороо, Vega city хотхоноос Рапид Хурд хороолол хүртэл 40 метр, “Orchid park” орон сууц, худалдаа үйлчилгээний цогцолбороос Japan Town хотхоны C3 блок хүртэл 176 метр авто зам гаргахаар орц, гарцыг чөлөөлж, холбоос замуудыг нээх ерөнхий төлөвлөлтийн зураг төслийг боловсруулж дуусжээ. Орц, гарцыг чөлөөлснөөр Соёмботой хөшөөнөөс урагш Ривер гарден хотхон хүртэл саадгүй зорчих, төв замын ачааллаас хуваалцах боломж бүрдэх аж.
Өнөөдрийн байдлаар тухайн байршилд авто зам гаргахад Рапид Хурд хорооллын налуу уналттай зам болон Vega city хотхоны доор байрлах “TARA Center” худалдаа, үйлчилгээний төвийн авто зогсоол тулсан байдалтай байгаа юм. Иймээс эхний ээлжид Vega city хотхоны доор байрлах “TARA Center” худалдаа, үйлчилгээний төвийн авто зогсоолоос 40 метр газрыг чөлөөлөхөөр тухайн хотхоны удирдлагуудтай зөвшилцөх юм.
Хэрэв зөвшилцөлд хүрвэл тухайн хэсэг газарт долоо хоногийн дотор авто замын холбооснуудыг гаргаж, тэмдэг, тэмдэглэгээ хийнэ гэж НЗДТГ-ын хэвлэлийн хэлтсээс мэдээлэв.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
