Boeing компани Хятадын захиалагчдын буцаасан 50 нисэх онгоцондоо шинэ худалдан авагч хайж байна

Трампын худалдааны дайны улмаас Хятадын захиалагчдын буцаасан 50 хүртэл тооны нисэх онгоцондоо шинэ худалдан авагч хайж байгааг Boeing компани мэдээлжээ.

АНУ-ын нисэх онгоц үйлдвэрлэгч дэлхийн хаа нэгтээ газраас худалдаж авах этгээд олдоно гэдэгт найдаж байгаагаа илэрхийлсэн байна.

Үүний хажуугаар бас үүссэн саад бэрхшээлийг арилгах талаар ерөнхийлөгч Трампыг “лоббидож” байгаагаа мэдэгджээ.

Бээжингийн эрх баригчид АНУ-ын бараа бүтээгдэхүүнд 125 хувийн импортын татвар ногдуулсны дараа Хятадын захиалагчид хоёр нисэх онгоцыг буцаасан бол бас нэг онгоц буцах замдаа явааг Boeing мэдээлсэн юм.

Дээрх арга хэмжээ нь Хятадын бараанд Трампын ногдуулсан 145 хувийн импортын татварын хариу алхам байлаа.

Лхагва гарагт хөрөнгө оруулагчдад улирлын тайлангаа танилцуулах үеэр Boeing компанийн гүйцэтгэх захирал Кэлли Ортбэрг гадаад худалдааны маргаан зөрчил удахгүй арилна гэдэгт найдаж байгаагаа илэрхийлсэн юм.

Энэ оны нэгдүгээр улиралд тус компанийн алдагдлын хэмжээ $31 саяд хүрсэн нь жилийн өмнөх мөн хугацааны $355 саяас эрс багассан үзүүлэлт болжээ.

Энэ онд Хятадын зах зээлд нийлүүлэгдэх есөн нисэх онгоц бэлэн болоод байгаа ба өөр 41 онгоц үйлдвэрлэлийн шатандаа байгааг Ортбэрг мэдээлсэн байна.

“Харамсалтай нь Хятад дахь манай олон харилцагч захиалгаа цуцалж болзошгүй байгааг бидэнд илэрхийлсэн. Гэхдээ дэлхийн өөр хэсэгт тэдгээрийг худалдан авах этгээд олдоно гэдэгт найдаж байна. Ерөнхийдөө дэлхий дахины эрэлт өндөр байгаа” гэж тэр хэлжээ.

Алдагдал нь багассан тухай мэдээ өчигдөр Boeing компанийн хувьцааны ханшийг 5.7 хувиар өсгөсөн байна.

Эх сурвалж: Associated Press