Л.Ариунтуяа: ТҮЦ эрхлэгчдэд санал болгож байгаа лангууны түрээсийг татвар төлөгчдийн мөнгөөр төлөхгүй

Нийслэлийн хэмжээнд автобусны буудал дээрх ТҮЦ-үүдийг нүүлгэж, явган хүний зам талбайг чөлөөлж буй. Уг асуудлаар НИТХ-ын төлөөлөгч, Соёлын Төв Өргөөний дарга Л.Ариунтуяа байр сууриа илэрхийллээ.

Тэрбээр "ТҮЦ эрхлэгчдийн араас хөөцөлдөөд явахад нэг хүн 5-6 зургаан ТҮЦ-тэй байх жишээний. ТҮЦ дотор ажиллаж байгаа хүнээс асуухад "Байрлалаасаа шалтгаалж сард 1-2 сая төгрөгөөр түрээсэлж ажилладаг" гэсэн мэдээллүүд өгч байсан.

Өнгөрсөн жил шалгалт хийхэд ТҮЦ дотроо хоолоо хийж идэх, хонох, ундааны саван дотор хөнгөнөөр бие зассан нөхцөл байдал илэрсэн. Тэгэхээр өөрчлөгдөх ёстой гэж харж байгаа. Автобусны буудал дээр хүний явах хэсэгт байршуулсан ТҮЦ-ийг нүүлгэж байгаа нь ая тухтай зорчих орчин бүрдэж байгаа юм.

Харин ТҮЦ эрхлэгчидтэй зөвөөр зохицох ёстой. Нийслэлийн зүгээс Нарантуул буюу хүнсний захуудад лангуу түрээсэлж, нэг жилийн төлбөрийг даах, ажлын байраар хангах саналуудыг тавьж буй.

Хархорин, Нарантуул худалдааны төвийн эзэдтэй уулзалт хийхэд ТҮЦ болон гар дээрээс худалдаа хийдгийг болиулмаар байгаа тухай хэлсэн юм. Худалдааны төвийн гадна хэсгээр ТҮЦ, жижиг үйлчилгээ гарчихаар иргэд зах руу нь орохгүй, дотор нь байгаа худалдаа эрхлэгчдийн орлогыг хаадаг байна. Тиймээс худалдааны төвүүд нийгмийн хариуцлагын хүрээнд ТҮЦ эрхлэгчдэд лангуу суллаж өгөх, ажлын байраар хангах гэрээ хэлцлүүд хийгдэж байгаа. Тэдэнд санал болгож байгаа лангууны түрээсийг татвар төлөгчдийн мөнгөөр төлөхгүй" гэв.

Нийслэлийн төвийн зургаан дүүрэгт нийт 1,100 орчим ТҮЦ зөвшөөрөлгүй үйл ажиллагаа явуулдаг бөгөөд өнөөдрийн байдлаар нийслэлийн Баянзүрх дүүрэгт 151, Сүхбаатар дүүрэгт 91, Баянгол дүүрэгт 204, Чингэлтэй дүүрэгт 33, Сонгинохайрхан дүүрэгт 48, Хан-Уул дүүрэгт 180 гээд 700 гаруй ТҮЦ-ийг нийтийн эзэмшлийн талбайгаас нүүлгэжээ.