ЖУРАМ: Хийн түлш болон цахилгаан халаагуурт шилжсэн гэр хорооллын айлд сард ₮50-250 мянгыг олгоно
Хийн болон цахилгаан халаагуурт шилжсэн гэр хорооллын бүх айлд сар бүр мөнгөн урамшуулал олгоно гэж мэдэгдээд байгаа. Уг урамшууллыг олгох журмын төслийг НИТХ-ын Зөвлөлийн хуралдаанаар хэлэлцжээ.
Нийслэлийн Агаар, орчны бохирдолтой тэмцэх газрын дарга Д.Мөнхбаатарын танилцуулснаар гэр, байшингаа дулаалж, дулаан алдагдалгүй болгох, хатуу түлшийг хэрэглээнээс халсан өрхүүдэд нэг удаа тоног төхөөрөмж үнэгүй суурилуулах болон бүх төрлийн хийн түлш болон цахилгаан халаагуурын хэрэглээний үнийн урамшуулал олгох талаар төсөлд тусгажээ. Ингэхдээ сарын хэрэглээнээс хамаарч нэг өрхөд сард 50-250 мянган төгрөгийн урамшуулал олгох юм байна.
Эхний ээлжид нийслэлийн агаарын бохирдол ихтэй бүсийн 52,000 өрхөд цахилгаан болон хийн түлшний хэрэглээг нэвтрүүлэхээр айл өрхүүдийн хэдэн хувь нь байшинд амьдардаг, гэрт амьдардаг, дулаалгыг хэрхэн хийх, аль өрхөд цахилгаан, аль өрхөд хийн түлшний төхөөрөмж суурилуулах талаар нарийн судалгааг гаргаж байгаа аж.
Гэр, байшингийн дулаалгыг нийслэлийн зүгээс хийх бөгөөд тухайн өрх нь гадна фасад болон үүдний амбаарын хэсгийн дулаалгыг заавал хариуцах юм байна.
Айл өрхүүдийг сонгохдоо бүсээр нь буюу агаарын бохирдол ихтэй хэсгийг сонгох бөгөөд нийслэлийн Засаг дарга, дүүрэг, хороодын Засаг дарга болон өрх гэсэн гурвалсан гэрээг байгуулж гэрээний дагуу хяналтын ажлын хэсэг ажиллуулахаар төлөвлөжээ.
Хийн түлшний төхөөрөмж суурилуулах ажилд Азийн сантай хамтарч зохион байгуулах сургалтад айл өрхийн гишүүдээс гадна онцгой, цагдаа, төрийн албан хаагчид, салбарын мэргэжилтнүүдийг хамруулна.
Зөвлөлийн хуралдаанаар “Нийслэлийн агаарын чанарыг сайжруулах гэр хорооллын өрхөд цахилгаан халаагуур болон бүх төрлийн хийн түлшээр ажилладаг төхөөрөмж суурилуулах, түүний хэрэглээнд үнийн урамшуулал олгох журам”-ыг НИТХ-ын ээлжит III хуралдаанаар хэлэлцэж, батлахаар болжээ.
Одоогоор НИТХ-ын ээлжит III хуралдааны товыг зарлаагүй байна.
Өнгөрсөн сард хотын дарга Х.Нямбаатар "Хийн болон цахилгаан халаагуурт шилжсэн гэр хорооллын бүх айлд адил 100,000 төгрөгийн урамшуулал олгоно" гэж мэдээлж байсан ч сарын хэрэглээнээс хамаарч нэг айлд 50-250 мянган төгрөгийн урамшуулал олгох бололтой.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
16 СЭТГЭГДЭЛТЭЙ
|
