Сиси хатан хааны ордон хэмээн алдаршсан Шёнбрунн ордны сонгодог хөгжмийн чуулга Монголд анх удаа ирнэ
Нэгэн үдэш Вена хотод очсон мэт…
Австрийн домогт Сиси хатан хааны ордон хэмээн монголчуудын сайн мэдэх, Вена хотын алдарт Шёнбрунн ордны сонгодог хөгжмийн чуулга Монгол Улсад анх удаа хүрэлцэн ирж, Венийн сонгодог хөгжмийн гайхамшгийг Улаанбаатарын үзэгчдэд толилуулах гэж байна.
Түүхийн хуудсыг сөхвөл, 1786 онд суут хөгжмийн зохиолч Вольфганг Амадей Моцарт Австрийн эзэн хаан II Иосефын хүсэлтээр Антонио Сальеритай хөгжмийн уралдаанд оролцож байсан газар нь Шёнбрунн ордны Оранжери танхим юм.
1754 онд баригдсан энэхүү түүхэн танхим эзэн хааны ёслол, хүлээн авалтын орчин байсаар иржээ. Хабсбургийн хаадын зуны өргөө байсан Шёнбрунн ордон, цэцэрлэгийн цогцолбор өнөөдөр ЮНЕСКО-гийн Дэлхийн өвд бүртгэгдсэн.
1997 онд байгуулагдсан Шёнбрунн ордны найрал хөгжим 2026 онд 10 мянга дахь тоглолтынхоо босгыг тэмдэглэхээр төлөвлөсөн нь тус ордны хөгжмийн уламжлалын цар хүрээг илтгэнэ. Харин энэ удаа Монголд Шёнбрунн ордны камер чуулгын хөгжимчид хүрэлцэн ирнэ.
Арванхоёрдугаар сарын 2, 3-ны үдэш болох “Венийн Гала Концерт”-оор Штраусын “Үзэсгэлэнт хөх Дунай”, “Хаврын дуу хоолой”, “Өмнөд нутгийн сарнай”, Легарын “Алт ба мөнгө” вальс болон “Радецкийн марш” зэрэг сонгодог хөгжмийн алдарт бүтээлүүд эгшиглэнэ.
Тоглолтын хамгийн онцгой хэсэг нь Венийн сонгодог хөгжим Монголын үндэсний язгуур урлагтай нэгэн тайзнаа уулзах явдал. Австрийн Шёнбрунн ордны чуулга “Түмэн Эх” чуулгатай хамтран, хоёр орны хөгжмийн уламжлалыг хослуулсан бүтээлүүдийг толилуулна.
Монгол дахь Австрид төгсөгчдийн “Эрдэм” холбооноос зохион байгуулж буй энэхүү арга хэмжээ нь “Хил хязгааргүй хөгжим” санаачилгын хүрээнд тасалбарын орлогын тодорхой хэсгийг Монголын залуу уран бүтээлчдийг дэмжих зорилгоор мэргэжлийн мастер класс сургалтад зориулна.
Европын эзэн хаадын ордны хөгжмийн уур амьсгалыг Монголдоо мэдэрч, ирээдүйн авьяаслаг хөгжимчдийг хамтдаа дэмжицгээе!
Тасалбар: ticket.mn/event/3309
Лавлах: 1900-1800
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
