Н.Учрал: Гашуунсухайтын төмөр зам, улс төрд үүссэн нөхцөл байдал нь Ерөнхийлөгч асан Х.Баттулгаас эхлэлтэй
Монгол Улсын Ерөнхий сайд Н.Учрал мэдэгдэл хийж байна.
Тэрбээр "Засгийн газрын үйл ажиллагаа хэвийн үргэлжилж байна. Цаашид ч хэвийн үргэлжилнэ. Өчигдөр Төрийн тэргүүн албан тушаалаа өгч, энгийн иргэний хувиар нэр төрөө сэргээлгэх шийдвэр гаргасан. Төрийн тэргүүний гаргасан ёс суртахууны үлгэр жишээ шийдвэрт хүндэтгэлтэй хандаж байгаа. Энэ жишгийн дагуу ЗГХЭГ-ын дарга, Монгол Улсын сайд Б.Энхбаяр, Хууль зүй, дотоод хэргийн дэд сайд Д.Мөнх-Эрдэнэ нар чөлөөлөгдөх өргөдлөө өглөө. Тэднийг өнөөдөр Засгийн газрын гишүүнээс чөлөөлж байгаа бөгөөд УИХ-д өргөн мэдүүлнэ.
Сүүлийн үед үүссэн асуудлуудаар УИХ дээр сонсгол санаачлан ажиллаж байсан гишүүдийн тавьж буй шаардлага, сөрөг хүчний шаардлагад тусгагдсан гол үндэслэлүүд болох Гашуунсухайтын төмөр зам, Бодь группийн оффтейк гэрээтэй холбоотойгоор байр сууриа илэрхийлье.
Үнэнийг хэлэх цаг ирлээ. Гашуунсухайтын төмөр зам, улс төрд үүссэн нөхцөл байдал бол ҮАБЗ-ийн тэргүүнээр ажиллаж байсан, Монгол Улсын Ерөнхийлөгчөөр асан Х.Баттулгаас эхлэлтэй.
Х.Баттулга Ерөнхийлөгч 2019 онд ҮАБЗ-ийг тэргүүлэн ажиллаж байхдаа Гашуунсухайтын төмөр замыг нууцад авсан. Оффтейк гэрээний ажлыг явуулна гэж урьдчилгаа төлбөр авах шийдвэр гаргуулсан. 280 сая ам.доллароор шороо овоолсон. Энэ асуудлаас болж өмнөөс нь гадаад дотоодын иргэд ял шийтгэл авч, зарим зөвлөх, туслах нь хил давж зугтсан" гэв.
Мөн тэрбээр хууль хяналтын байгууллагуудад Ерөнхий сайд хугацаатай үүрэг өгнө гэлээ.
Батлан хамгаалахын сайд Д.Батлут албан тушаалаасаа чөлөөлөгдөх хүсэлтээ Ерөнхий сайдад өгөөд буй. Гэхдээ Монгол Улсын Ерөнхийлөгч, Зэвсэгт хүчний ерөнхий командлагч үүрэгт ажлаасаа өөрийн хүсэлтээр чөлөөлөгдөж байгаа тул сайд Д.Батлутын өргөдлийг шийдээгүй байна. Мөн Батлан Хамгаалах Яамны Төрийн нарийн бичгийн даргыг улираан томилжээ.
Шууд үзэх:
Мэдээллийг дэлгэрүүлж байна
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!

