А.Амартүвшин: Шингэрүүлсэн байгалийн хийг ОХУ-аас тусгай тоноглол бүхий танканд хийж, галт тэргээр авчирна

Гэрэл зургийг MPA агентлагийн онцгой зөвшөөрөлтэйгөөр ашиглав

НИТХ-ын өнөөдрийн хуралдаанаар агаарын бохирдлыг бууруулах арга хэмжээний талаар хэлэлцэж байна. 

Энэ үеэр Нийслэлийн Засаг даргын Нийгмийн салбар, ногоон хөгжил болон агаар, орчны бохирдлын асуудал хариуцсан орлогч А.Амартүвшин "Энэ онд нийслэлийн төсвийн 170.1 тэрбум төгрөгөөр агаарын бохирдлыг бууруулах дөрвөн төсөл арга хэмжээг хэрэгжүүлнэ.

Тодруулбал Москва хороолол, Нэгдүгээр хороолол, 3, 4 дүгээр хорооллын арын дэнж, Эх нялхас, Гандан, 32-ын тойргийн хотын төв дэх бүс зэрэг байршлын гэр хорооллыг ногоон бүсэд хамруулж, 22,000 гаруй айлыг хийн түлшний дэд бүтцэд холбох юм. Шингэрүүлсэн байгалийн хий болон шингэрүүлсэн нефтийн хийд холбоно. Ногоон бүс нь 20,000 нэгж талбарыг хамарна.

Эдгээр айл өрхийг шингэрүүлсэн хийн түлш хэрэглэдэг болгосноор гэр хорооллоос үүдэлтэй агаарын бохирдол 2025-2026 онд шилжих өвөл агаарын бохирдол 15% буурна гэсэн судалгаа гарсан.

2024 оны жилийн эцсийн байдлаар 159,925 өрх шахмал түлшийг хэрэглэж байна.

2025 оны гуравдугаар сарын 31-ний өдрөөс "Тавантолгой түлш" компанийн үйлдвэрлэж байгаа шахмал түлшний үйлдвэрлэлийг зогсоож, есдүгээр сарын 15-наас "Эрдэнэс Тавантолгой" компанийн эрчим хүчний баяжуулсан шахмал түлшинд шилжинэ. Ингэснээр агаарын чанар 12%-аар сайжрах тооцоололтой.

2026-2027 онд 13,620 өрхийг орон сууцанд, 82,700 өрхийг шингэрүүлсэн хийд, 745 өрхийг сэргээгдэх эрчим хүчинд шилжүүлнэ.

2028 онд хагас коксожсон нүүрсний үйлдвэрийг ашиглалтад оруулж, 48,628 өрхийг хангана.

Улаанбаатар хотод 2030 оноос хатуу түлшний хэрэглээг халах төлөвлөгөөтэй.

2029 онд хагас коксожсон нүүрсэнд 55%, хийн түлшинд 81.6%, сэргээгдэх эрчим хүч рүү 0.6%, 2032 онд шингэрүүлсэн хийн түлш болон сэргээгдэх эрчим хүч рүү 100% шилжихээр төлөвлөлөө. Ингэснээр гэр хорооллоос үүдэлтэй агаарын бохирдлыг 15-55.6% буурна гэж тооцоолж байна" гэж танилцууллаа.

Шингэрүүлсэн хийг хаанаас авах тухайд "LNG буюу шингэрүүлсэн байгалийн хийг амины орон сууцанд, LPG буюу нефтийн шингэрүүлсэн хийг гэр сууцанд ашиглана.

Гэр хорооллын 50,000 өрхийг хангах хүчин чадалтай шингэрүүлсэн хийн нэг станц барих бөгөөд зардал нь 12 сая ам.доллар бол холбох шугамын зураг хийгдэж байна. 

Шингэрүүлсэн хийн эрэлт нэмэгдэж буйтай холбогдуулан эхний ээлжид 5,500 километрийн холоос буюу ОХУ-ын Кингисепп дэх шингэрүүлсэн байгалийн хийн үйлдвэрээс авахаар төлөвлөж байна. 2026 онд Кимирово үйлдвэр ашиглалтад орно, ингэснээр 3,500 километрийн зайнаас шингэрүүлсэн байгалийн хийг тээвэрлэнэ. 

Байгалийн шингэрүүлсэн хий буюу LNG-г хоёр аргаар тээвэрлэж авчирна. ОХУ-аас тусгай тоноглол бүхий танканд хийж, галт тэргээр тээвэрлэн Толгойт өртөөнд хүргэнэ. Толгойт өртөөнөөс Улаанбаатар хот руу цистерн автомашинаар тээвэрлэхээр төлөвлөж байгаа" гэв.

2024 оны байдлаар 2,110 иргэн угаарын хийн хордлогод өртөж, 56 иргэн нас баржээ.