Эмэгтэй тамирчдаас генетикийн шинжилгээ авдаг болно

Олон Улсын Хөнгөн Атлетикийн Холбоо (World Athletics) эмэгтэй тамирчдаас генетикийн шинжилгээ авч байхаар болов. 

Энэ талаар тус холбооны тэргүүн Себастьян Коу Мягмар гарагт болсон зөвлөлийн хурлын үеэр дүрмийг илүү боловсронгуй болгох талаар хэлэлцсэний дараа олонд мэдэгдсэн юм. 

Дүрмийг албан ёсоор баталсны дараа хацрын арчдас эсвэл хуурай цусны толбоны шинжилгээнд туршлагатай үйлчилгээ үзүүлдэг байгууллагыг сонгоно гэдгээ С.Коу мэдэгджээ.

Тамирчид хүн болон бусад ихэнх хөхтөн амьтдын эр хүйсийг тодорхойлдог SRY генгүй гэдгээ харуулахын тулд замналдаа ганц удаа шинжилгээ өгөх ёстой.

Бусад спортын нэгэн адил хөнгөн атлетик нь трансжендер тамирчдын биологийн давуу тал болон хүйсийн хөгжлийн ялгаа (DSD) зэрэгтэй холбоотой эмэгтэйчүүдийн төрөлд өрсөлдөх шалгуурын талаар олон жил хэлэлцсэн.

Одоогоор трансжендер эмэгтэйчүүдийн бие дэх тестостероны түвшин өндөр бол бууруулахыг шаарддаг.

Уг асуудлыг судлах Ажлын хэсэг өнгөрсөн сард эдгээр дүрэм хангалттай биш байгааг тогтоосон юм. Тодруулбал тэд эрэгтэйчүүдийн бэлгийн бойжилтын үеийг даваагүй байсан ч эмэгтэй тамирчдаас давуу талтай гэж дүгнэжээ.

SRY генийн шинжилгээ нь дүрмийн шинэчилсэн найруулгын талаар Зөвлөлөөс гаргасан хэд хэдэн зөвлөмжийн нэг байв.

Шинэ дүрэм нь хуулийн сорилт, хяналт шалгалтыг даван туулна гэдэгт итгэлтэй байгаагаа С.Кое мэдэгджээ. Тэрбээр "Бид эмэгтэй тамирчдыг шаргуу хамгаалж, үүний тулд чадах бүхнээ хийх болно" гэж онцолсон байна.

Саяхан Олон Улсын Олимпын Хороо (ОУОХ)-ны ерөнхийлөгчийн сонгуульд найман санал авч, ялагдсан ч С.Коу олимпод түрүүлсэн тамирчдын мөнгөн шагналыг нэмэх бодлогоо үргэлжлүүлнэ гэв. Өнгөрсөн жил Парист болсон олимпод алтан медаль хүртсэн тамирчид 50,000 ам.долларын урамшуулал хүртсэн. Үүгээр ч зогсохгүй 2028 оны олимпод мөнгө, хүрэл медаль хүртсэн тамирчдад мөнгөн урамшуулал олгохоо амласан юм.

Түүний энэ бодлогыг ОУОХ байнга шүүмжилдэг.

Харин С.Коу тамирчдын санхүүгийн аюулгүй байдлыг хангах нь миний зорилго гэж тодотгожээ. Ирэх дөрвөн жилд болох олимпын циклийн нийт шагналын сан $51 сая байхаар төлөвлөж байгаа аж.

Мөн Москва Украиныг эзлэн түрэмгийлсэн 2022 оноос хойш ОХУ, Беларусийн тамирчдын эсрэг авсан хориг арга хэмжээнд өөрчлөлт орохгүй гэв.

Эх сурвалж: Reuters