Гол мөрнүүдийн мөсний зузаан нэмэгдэж байгаа ч зарим газраар өмнөх оны мөн үеэс 5-55 см-ээр бага байна

Гэрэл зургийг MPA агентлагийн онцгой зөвшөөрөлтэйгөөр ашиглав

Монгол орны гол мөрний мөсний үзэгдэл, зузааны тоймыг Цаг уур, орчны шинжилгээний газраас мэдээллээ. 

Номхон далайн ай савын гол, мөрөн:

• Хэнтий нурууны ар, зүүн хажуугаас усжих Хурх, Барх, Эг, Онон, Балж, Хэрлэн , Улз болон Их Хянганы нуруунаас эхтэй Халх голын дагууд мөсний зузаан нэгдүгээр сарын эхний арав хоногт 5-10 нэмэгдэж, 55-115 см зузаан мөсөн бүрхүүлтэй болсон хэдий ч энэ нь 2024 оны мөн үеэс 5-50 см нимгэн мөсөн бүрхүүлтэй байна. 
• Хэрлэн-Мөнгөнморьт ус судлалын харуул орчимд мөсний зузаан өмнөх арав хоногоос 10 см нимгэрсэн байна. Харин Буйр, Дуут, Хөх нуурт 75-115 см зузаан мөсөн бүрхүүл тогтсон нь өмнөх арав хоногоос 5-15 см нэмэгджээ. 

Төв Азийн гадагш урсацгүй ай сав:

• Алтай нуруунаас эхтэй Ховд, Буянт, Булган, Сагсай, Бодонч, Согоог, Дундцэнхэр, Чонохарайх, Төгрөг, Долооннуур зэрэг голуудын мөсний зузаан өмнөх арав хоногийнхоос 5-35 см нэмэгдэж, 40-95 см зузаан мөсөн бүрхүүлтэй болсон байна. Алтайн уулсаас эхтэй дээрх голуудын мөсний зузааныг өнгөрсөн оны мөн үетэй харьцуулбал 10-55 см нимгэн харин Буянт, Турган, Үенч, Бодонч, Долооннуур голуудын хувьд 5-25 см ахиу байна. Хар ус нуурын мөсний зузаан өмнөх арав хоногоос 5 см нэмэгдэж, 65 см зузаан мөстэй болсон.
• Хангай нурууны өврөөс усжих ихэнх гол ёроолдож хөлдсөн бол Чигэстэй, Богд, Буянт, Хожуул, Завхан, Зүйл, Шарга, Түй, Байдраг, Онги, Таац зэрэг голын мөсний зузаан өмнөх хугацаанаас 5-30 см нэмэгджээ. Хангайн өврийн голуудын мөсний зузаан 2024 оны мөн үеийнхээс 5-20 см нимгэн байна. Хар нуур, Ойгон, Орог, Хөх нуур, Бөөнцагаан нуурын мөсний зузаан өнгөрсөн арав хоногт 5-10 см нэмэгдэж, 45-105 см зузаан мөстэй болсон байна.
• Увс нуурын савын Чигж, Хархираа, Баруунтуруун, Хариг, Хангилцаг, Намир, Түргэн, Тэс зэрэг голуудын мөсний зузаан өнгөрсөн хугацаанаас 5-20 см нэмэгдэж, 25-110 см зузаан мөстэй болсон ба энэ нь өмнөх оны мөн үе болон олон жилийн дунджаас 5-20 см ахиу харин Хархираа, Хариг, Түргэн, Баруунтуруун голуудын хувьд 5-35 см нимгэн мөстэй байна. Увс нуурын мөсний зузаан 7 см нэмэгдэж, 47 см орчим зузаантай байна.