"The MongolZ"-ийн хөвгүүд Европын "MOUZ" багт хожигдсоноор ДАШТ-ээ өндөрлүүллээ

hltv.org

Counter Strike-2 (CS2) тоглоомын энэ оны хоёр дахь Дэлхийн Аварга Шалгаруулах Тэмцээн (ДАШТ) буюу "Perfect World Shanghai Major 2024" Хятадын Шанхай хотод зохион байгуулагдаж байгаа билээ.

Дэлхийн шилдэг 24 баг өрсөлдсөн тус тэмцээний шилдэг найман багийн тоглолтууд өнөөдөр эхэлж байна. Манай улсын "The MongolZ" баг шөвгийн наймын тоглолтоо Европын "MOUZ" багийн эсрэг "Во3" (гурван "map"-аар ялагчийг тодруулах) журмаар хийж, 0:2-ээр ялагдлаа. 

Тэд өөрсдийн сонгосон эхний "Ancient map" дээр довтлох талаасаа 9:3-аар байраа сольсон. Түрүүлж 13 үеийг авсан нь ялах байсан боловч манай баг 12:7 онооны харьцаатай байх үед таван үе дараалан алдсан юм. Улмаар нэмэлт үед 14:16-аар ялагдал хүлээсэн. 

Харин эсрэг багийн сонгосон хоёр дахь "Nuke map" дээр эхний зургаан үеийг авсан боловч 9:12-оор хожигдлоо. Ийнхүү манай улсын баг ДАШТ-д 5-8 дугаар байр эзэлж, 45 мянган ам.долларын шагнал хүртэж байна.