CU болон GS25 конвиниенс дэлгүүрүүд ЦЕГ-тай хамтран “Соёл танаас эхэлнэ” нийгмийн аяныг эхлүүлэв

CU болон GS25 конвиниенс дэлгүүрүүд нь Цагдаагийн Ерөнхий газартай хамтран “Соёл танаас эхэлнэ” нийгмийн аяныг эхлүүллээ Цагдаагийн Ерөнхий Газар 2024 оны 11-р сарын 11-ний өдрөөс хэрэгжүүлж эхэлсэн “Соёл танаас эхэлнэ” аяныг дэмжин, CU болон GS25 конвиниенс дэлгүүрүүд хамтран ажиллахаар болсон тухай хэвлэлийн бага хурал 11 сарын 14-нд болж өнгөрлөө. 

Аяны гол зорилго нь олон нийтэд эерэг нөлөө үзүүлэх, соёлыг түгээхэд чиглэсэн бөгөөд хоёр байгууллагын зорьж буй үнэт зүйлстэй бүрэн нийцэж, хамтын хүчээр үр дүнд хүрэхийн төлөө ажиллаж эхэллээ. Энэхүү аян нь иргэдийг цахим орчин болон олон нийтийн газарт хүндэтгэлтэй, соёлтой харилцахыг уриалж байгаа бөгөөд энэ үйлсэд хүн бүрийн оролцоо чухал юм. Бидний зорилго бол бусдад эелдэг хандаж, хүндэтгэлтэй харилцахын чухлыг ойлгуулан, соёлтой нийгмийг хамтдаа бүтээх юм. CU болон GS25 брэндүүд Монгол улсад Дэлхийн жишиг үйлчилгээг нэвтрүүлэхийг зорьж, эелдэг найрсаг үйлчилгээ, мэндчилгээний соёлыг хэвшүүлэн, худалдаа үйлчилгээний салбарт өөрчлөлт шинэчлэлтийн салхийг бий болгосон гэхэд хилсдэхгүй.  

Тус хэвлэлийн бага хурлаар CU, GS25 дэлгүүрүүд хэрэглэгчдэд үйлчилгээ үзүүлэх үед үйлчлүүлэгчийн зохисгүй харилцаа, дээрэлхэлт, ажилтны шаардлагыг биелүүлэхгүй байх зэрэг асуудлууд тулгардаг талаар дурдлаа. Хэрэглэгч үйлчлүүлэгчийн энэ хандлага нь ажилтнуудын сэтгэл санааны байдалд сөргөөр нөлөөлж, ажлаас гарах гол шалтгаануудын нэг болж байгааг онцоллоо.  

Энэхүү аяны хүрээнд өсвөр насны хүүхдэд тамхидалт, согтууруулах ундааг худалдаалахгүй байх дотоод журмыг санаачлан хэрэгжүүлж хяналттай худалдааны соёлыг нэвтрүүлэхээр зорьж байгаа санаачилгыг “Боловсролын яам” дэмжин хамтран ажиллахаар болжээ. Энэ нь өсвөр үеийг буруу зуршлаас ангид байлгах, ирээдүйн соёлтой нийгмийг бүтээхэд чухал алхам болно гэж үзэж байна. Хэвлэлийн бага хурлын төгсгөлд иргэдийг олон нийтийн газарт болон цахим орчинд бусдад хүндэтгэлтэй, эелдэг хандаж, бусадтай харилцахдаа соёлтой байхыг уриалж, иргэдийн зөв үлгэрлэлээс соёлтой нийгэм эхэлнэ хэмээн цохон тэмдэглэлээ. 

 

Боловсролын яам 
Цагдаагийн Ерөнхий Газар 
Монголын Сурагчдын холбоо ТББ 
Худалдаа үйлчилгээний CU, GS25 сүлжээ дэлгүүр