Х.Нямбаатар: Батлагдсан хуулийг Үндсэн хууль зөрчсөн гэх эрх хууль зүйн сайдад байхгүй

Гэрэл зургийг MPA агентлагийн онцгой зөвшөөрөлтэйгөөр ашиглав

Нийслэлийн Иргэдийн Төлөөлөгчдийн Хурлын анхдугаар хуралдаанаар хотын захирагчийн 2024-2028 онд хэрэгжүүлэх үйл ажиллагааны хөтөлбөрийг хэлэлцэж байна. Энэ үеэр хотын дарга Х.Нямбаатар импортын машинд Улаанбаатарын улсын дугаар олгохгүй байх тогтоол хэрэгжиж эхэлсэн ч эсэргүүцэлтэй тулгарч байгаа талаар байр сууриа илэрхийлэв.

Тэрбээр "Импортын машинд улсын бүртгэлийн дугаар олгохгүйтэй холбоотой хуулийг өнгөрсөн оны 12 дугаар УИХ-аас баталсан. Хуулийн дагуу НИТХ-аас журам баталсан нь хэрэгжиж байгаа юм. Би хууль зөрчиж чадахгүй. "Нямбаатарыг огцруулна" гэж акц хийж байна гэсэн, машины ченжүүдээс айхгүй. 2024 онд 140,000 машин оруулж ирчхээд байгаа юм. Метро, тойрог зам бариад жил бүр ийм тооны машин оруулж ирээд байвал энэ их машин явах зам хотод байхгүй. Тэд суулт хийвэл би хэлэх үгтэй.

Цаашид нийслэл Улаанбаатар хотод автомашин эзэмшигч нь өөрийн болон түрээсийн зогсоолтой байх ёстой гэж журамлаж байгаа. Одоо бодит байдал явган хүний зам дээр машинаа тавьчхаад байгаа юм. Батлагдсан хуулийг Үндсэн хууль зөрчсөн гэх эрх О.Алтангэрэл сайдад байхгүй, ганцхан Үндсэн Хуулийн Цэц энэ тухай дүгнэлтийг гаргадаг" хэмээв.

ВИДЕО: 

Нийслэл хотод авто тээврийн хэрэгслийн улсын бүртгэлийн дугаар олгох шалгуур үзүүлэлтийг батлах тухай захирамж хэрэгжиж эхэлснээр Үндсэн хуульд заасан иргэд хөдлөх хөрөнгөө олж авах, эзэмших, өмчлөх эрхийг хязгаарласан зэрэг агуулгатай Автомашины худалдаа, машины бизнес эрхлэгчдийн холбоо, Эко автомашин импортлогчдын холбооноос ирүүлсэн хүсэлтийг Хууль зүй, дотоод хэргийн сайд О.Алтангэрэл хотын даргад уламжилжээ.