П.Ганцоож: НИТХ-аас гаргасан шийдвэр батлагдчихвал автомашины бизнес эрхэлж буй 3,000 гаруй иргэн зах зээлээс арчигдана

Гэрэл зургийг MPA агентлагийн онцгой зөвшөөрөлтэйгөөр ашиглав

Авто худалдаа, машин бизнес эрхлэгчдийн холбооноос хотын дарга Х.Нямбаатарт Улаанбаатар машины улсын дугаар олгохыг хязгаарласан асуудлаар шаардлага хүргүүлжээ. 

Энэ талаар Автомашины худалдаа эрхлэгч П.Ганцоож Хангарди ордны гадна өнөөдөр мэдээлэл өглөө. Тэрбээр "Нийслэл хотын замын хөдөлгөөний түгжрэлийг бууруулах, гэр хорооллыг орон сууцжуулах тухай хууль өнгөрсөн онд батлагдсан. 

Тус хуулийн дагуу Нийслэлийн Иргэдийн Төлөөлөгчөөс Хурлаас автомашины улсын дугаарын дээд хязгаарын 730 мянгад байлгах шийдвэр гарсан. Энэ шийдвэр биелээгүй явж байхад гуравдугаар сард АТҮТ-өөс 20 мянган улсын дугаар шууд гаргасан. 

Гэтэл өнгөрсөн сарын 23-нд автомашины улсын дугаар олголтыг хязгаарлах шийдвэр гарсан байна. Энэ шийдвэр нь нийтийн хэлэлцүүлэг явуулаагүй, хүнийг ялгаварлан гадуурхсан байна гэх гомдлыг Хууль Зүй, Дотоод Хэргийн Яаманд бид хүргүүлж, НИТХ-ын захирамжийг буцаалгасан.

Үүний дараа энэ оны арваннэгдүгээр сарын 13-нд манай холбоо, Эко автомашины холбооны удирдлагуудтай хамтран Нийслэлийн засаг даргын нэгдүгээр орлогч Т.Даваадалайтай уулзаж, өөрт байгаа бэрхшээлээ тайлбарлахыг оролдсон. 

Түүнчлэн "та нарын гаргасан гэнэтийн шийдвэрээс болж Японоос хөдлөх гэж байгаа болон замд явж буй 40 мянган автомашиныг яах вэ, цаашдаа манай хоёр холбоо хамтран ажиллаж, саналаа тусгаж болох уу. Асуудлынхаа нэг талд гарчхаад тухайн шийдвэрийг хэрэгжүүлье" хэмээн ярилцсан байгаа. Нийслэлийн удирдлагууд "дараагийн долоо хоногийн Пүрэв гарагийн дотор хариу өгье" гэж яриад уулзалт дууссан. 

Гэвч өчигдөр болон өнөөдрөөс эхэлж зарим хэвлэлд нийслэлийн удирдлагууд мэргэжлийн холбоодтой уулзаж зөвшилцөлд хүрсэн мэтээр ойлголт өгч байна. Нийслэлийн засаг даргын нэгдүгээр орлогч Т.Даваадалайтай хийсэн энэ сарын 13-ны өдрийн уулзалтаар журмын хэлэлцүүлэг зохиогдоогүй болохыг албан ёсоор мэдэгдье.

Энэ хэлэлцүүлгийг зохион байгуулах ёстой хамгийн чухал асуудал бол бизнесийн шударга өрсөлдөөнийг боож байна. Хэрэв НИТХ-аас гаргасан шийдвэр батлагдчихвал автомашины бизнес эрхэлж буй 3,000 гаруй иргэн зах зээлээс арчигдана. Хэдхэн монополи компани үлдэнэ. 

УИХ болон орон нутгийн сонгуулиар энэ ажлаа хийгээгүй атлаа автомашины улсын дугаар олголт 800 мянгыг давсан гэж ярьж байна. Бид ингэтэл нь өсгөөгүй. Эртнээс хэлэлцүүлэг хийж, цаг хугацаа өгсөн бол бид шалгуурт нь нийцэх автомашиныг импортоор оруулаад ирнэ.

Өнгөрсөн долоо хоногийн Даваа гарагаас шинэ журам үйлчилж, улсын дугаар олгогдохгүй байна" хэмээн ярилаа.