“Инвескор ББСБ” ХК Казахстан улсад охин компаниа байгууллаа

Инвескор санхүүгийн байгууллага Казахстан Улсад охин компаниа байгууллаа. Тодруулбал, “Инвескор ББСБ” ХК нь Төв Ази дахь үйл ажиллагаагаа тэлж Казахстан улсад “Инвескор Финанс” охин компаниа байгуулах албан ёсны нээлтийн үйл ажиллагаа 2024 оны есдүгээр сарын 14-нд боллоо.

Ингэснээр тэд төв азийн 2 дахь улсдаа охин компаниа байгуулж, үйл ажиллагаа эрхэлж буй нь энэ юм. Монгол санхүүгийн байгууллага олон улсад зах зээлээ тэлж, гаднын хэрэглэгчдэд хүрч үйлчилгээ үзүүлэх боломж бүрдэж байгаа дээр Монгол мэргэжилтнүүд ч Төв Азид олноороо ажиллаж, удирдан түүчээлэх үүд хаалга өргөжин тэлж буй нь сайшаалтай.

 

“Инвескор” санхүүгийн байгууллага нь бичил санхүүгийн зах зээлд дэвшилтэт технологи, шинэлэг шуурхай үйлчилгээг нэвтрүүлж, харилцагчдынхаа санхүүгийн “ХАРИУЦЛАГАТАЙ ДЭМЖИГЧ” байх зорилготойгоор 2016 онд үйл ажиллагаагаа эхлүүлж 19 онд нээлттэй хувьцаат компани болжээ. Тус компани одоогийн байдлаар Улаанбаатар хотод төв оффисоос гадна 13 салбар, Дархан хотод 1, Эрдэнэт хотод 1, Киргиз улсад 4, Казахстан улсад 1 салбартайгаар үйл ажиллагаагаа явуулж байна.

 

Сонирхуулахад Казахстан улс нь 20 сая хүн амтай бөгөөд дотоодын нийт бүтээгдэхүүнээрээ дэлхийд 43-т жагсаж, эдийн засгийн чадавхаараа Төв Азидаа тэргүүлэгч орон юм. Одоогоор тус улсад банк бус санхүүгийн 221 байгууллага үйл ажиллагаагаа явуулдаг бөгөөд “Инвескор Финанс” охин компани нь Казахстан улсад дэвшилтэд технологи, шуурхай үйлчилгээгээ нэвтрүүлэн ажиллахаар зорьж байна.