Европын Аварга Шалгаруулах Тэмцээн (ЕАШТ)-ий хагас шигшээд өрсөлдөх багууд тодорлоо. Тивийн аваргад хамгийн олон түрүүлсэн хоёр баг болох Испани, Герман хоорондоо учраа таарахад испаничууд 2:1-ээр илүүрхсэн. 

Тэгвэл Криштиану Роналдутай Португал Францад торгуулийн цохилтоор дийлдсэн бол англичууд Швейцартай үндсэн цагт 1:1-ээр тэнцсэн ч пеналт цохиход 5:3-аар хожсон юм. Түүнчлэн нидерландчууд турк залууст эхний гоолыг алдсан ч 2:1-ээр хожиж дөнгөв.

Франц (1837.47 оноогоор дэлхийн чансааны №2)

евро-гийн дээд амжилт

• Хоёр удаа түрүүлсэн (1984, 2000) 

 

2012 оноос хойш анх удаа хэсгээ тэргүүлж чадаагүй францчууд тэмцээний турш гуравхан гоол оруулсан ч хагас шигшээд хүрлээ. Тэд хэсгийн шатанд Польштой 1:1-ээр тэнцэж, Австрийг 1:0-ээр хожсон бол Нидерландтай эвийн гэрээ байгуулсан.

Улмаар шөвгийн 16-д Бельгийг 1:0-ээр хожиж, хагас шигшээд Португалтай 0:0-ээр тэнцсэн ч торгуулийн цохилтоор хожлоо.

Англи (1787.88 оноогоор №5)

 

евро-гийн дээд амжилт

• Мөнгөн медаль (2020)

Францыг бодвол англичууд таван тоглолтод таван гоолтой яваа. Гарет Саутгейтийн шавь нар хасагдах шатны хоёр тоглолтод дараалан нэмэлт цаг сунгаж, Швейцарыг торгуулийн цохилтоор буулган авснаар хагас шигшээд туналаа. 

Нидерланд (1746.66 оноогоор №7)

 

евро-гийн дээд амжилт

• Нэг удаа түрүүлсэн (1988)

Хэсэгтээ гуравдугаар байр эзэлсэн ч Улбар шарууд Румыныг 3:0-ээр илүүрхээд Туркт эхний гоолыг алдсан ч Мерт Мюлдерийн өөрийн хаалганд оруулсан гоолын ачаар хагас шигшээд үлдлээ. Тус багийн довтлогч Коди Гакпо одоогийн байдлаар гурван гоол оруулсан үзүүлэлтээр мэргэн буучийн жагсаалтыг гурван тоглогчийн хамтаар тэргүүлж буй. Гүрж, Словак, Герман хасагдсан тул түүнд хувийн амжилтаа ахиулах боломж бий.

Испани (1729.92 оноогоор №8)

 

евро-гийн дээд амжилт

• Гурван удаа түрүүлсэн (1964, 2008, 2012)

ЕАШТ-ий таван тоглолтод 11 гоол оруулж, ердөө хоёрыг алдсан испаничууд талбайн эздийг "гомдоосон" ч хагас шигшээд хийх тоглолт тэдний хувьд хүн цөөн байх нь. Залуу хагас хамгаалагч Педри нь Германы эсрэг бэртэж тоглолтоос гарсан бол туршлагатай хамгаалагч Дани Карвахаль, Робин Ли Норманд, довтлогч Алваро Мората нар торгуулийн улмаас талбайд гарахгүй боллоо.