МАН-ын УЗ-ийн хурлаар УИХ-ын даргын томилгоог хэлэлцэж байна

Гэрэл зургийг MPA агентлагийн онцгой зөвшөөрөлтэйгөөр ашиглав

УИХ-ын шинээр сонгогдсон гишүүд Төрийн ордонд үнэмлэхээ гардан авлаа. Үргэлжлүүлэн шинээр бүрдсэн парламентын анхдугаар чуулганыг 2024 оны долоодугаар сарын 2-ны өдөр хуралдуулах тухай Монгол Улсын Ерөнхийлөгчийн зарлиг гарав. 

Эдгээр үйл явдалтай зэрэг шахам эхэлсэн МАН-ын Удирдах зөвлөлийн хурал Тусгаар тогтнолын ордонд үргэлжилж байна. Тус хурлаар УИХ-ын даргын томилгоог хэлэлцэж байгаа. 

Төрийн гурван өндөрлөгийн нэг гэгддэг энэхүү албан тушаалд УИХ-ын гишүүний үнэмлэхээ дөнгөж гардаад буй Д.Амарбаясгалан, Ж.Энхбаяр нарын нэрс яригдаж буй. Тэднээс Д.Амарбаясгалан шинээр бүрдсэн парламентыг даргалах магадлал өндөр байгаа аж. 

Маргааш хуралдах анхдугаар чуулганаар дараах асуудлыг хэлэлцэнэ: 

• шинээр сонгогдсон гишүүдийг тангараг өргүүлж, бүрэн эрхийг нь хүлээн зөвшөөрөх;
• Улсын Их Хурлын даргыг сонгох;
• нам, эвслийн бүлэг байгуулсан тухай мэдээллийг Улсын Их Хурлын даргад бичгээр ирүүлснийг сонсох;
• Улсын Их Хурлын дэд даргыг сонгох;
• Байнгын болон дэд хороодын бүрэлдэхүүнийг баталж, Байнгын хорооны дарга нарыг сонгох;
• Ерөнхий сайдыг томилох;
• Засгийн газрын бүтцийн тухай болон Засгийн газрын бүрэлдэхүүний тухай хуулийн төслийг хэлэлцэн батлах;
• Засгийн газрын гишүүдийг томилох тухай Ерөнхий сайдын танилцуулгыг сонсох;
• шинээр томилогдсон Засгийн газрын гишүүдийг тангараг өргүүлэх;
• Улсын Их Хурлын чуулганы хуралдааны дэгийг шинэчлэн тогтоох эсэх асуудлаар шийдвэр гаргах.