Солонгон хөшигтэй зүлэг: 

Амьд ногоон зүлгэн дээр иргэд сууж, хэвтэж бас гишгэж болно. Энэ талбайн усжуулалтын систем бүрэн хүчин чадлаараа ажиллахад манан үүсэж, солонго татдаг онцлогтой аж.  

"Амгалан" зүлгийг бий болгохын тулд таваас найман төрлийн үр хольж цацсан байна. 

Амьд ногоон зүлэг хүнд таатай мэдрэмж төрүүлэхийн зэрэгцээ алжаал ядаргааг тайлах өндөр ач холбогдолтой. Уг талбайн хөрсөн доорх бүтээн байгуулалтын ажил "Рио Тинто" компанийн инженерүүдээс ихээхэн ур ухаан, хичээл зүтгэл шаарджээ. 

Зүлгийн доор усжуулалт шугам байрлуулснаар парк удаан амьд сэргэг байх боломжтойг инженерүүд хэлж байлаа. 

Энэ талбай цөөрмийн устай холбоотой бөгөөд бороо хур элбэг орж, үерийн эрсдэл учирвал тогтсон усыг хуримтлуулж, шингээгээд дахин усжуулалтад ашиглах боломжит инженерийн шийдлээр бүтсэн байна. 

Гэрлийн бохирдолгүй цэцэрлэгт хүрээлэн: 

Шинэ цэцэрлэгт хүрээлэнгийн зам бүхэлдээ бүдгэрүүлсэн гэрэлтэй. Оройн цагаар гэрлийн бохирдол үүсгэж, хүний нүд ядраах хүнд орчин үүсэх эрсдэлийг инженер, техникийн ажилчид мөн тооцоолжээ. 

Гэрлийн бохирдол үүсгэхгүй, орчны шуугиан багатай ногоон орон зайг бий болгохоор ажилласан гэдгийг онцолж байлаа. 

Задгай ногоон талбай: 

Урлаг соёлын арга хэмжээг цомхон хийхийг хүссэн хэн бүхэнд задгай театр нээлттэй. Тухайлбал хөгжим тоглож, дуу хууртай үдшийг өнгөрүүлэх хүсэлтэй хүмүүст ийнхүү боломж олгожээ. 

Зориулалтын скейтбордын талбай: 

Нийслэлийн иргэдээс ирсэн 10,000 гаруй саналыг үндэслэн цэцэрлэгт хүрээлэнд скейтбордын талбайг байгуулжээ.

Энгийн бетоноор скейтбордын талбайг барьж болдоггүй учир тусгай хольцыг гарган авч, нарийн ажиллагаа, инженерчлэлийн ур ухаан, тооцоолол дээр суурилан олон улсын стандартын дагуу барьж байгуулсан гэдгийг хэлж байлаа. 

Япон архитектурын шийдлээр бүтсэн ариун цэврийн байгууламж: 

Цэцэрлэгт хүрээлэн хоёр ариун цэврийн байгууламжтай. Энэхүү ариун цэврийн байгууламжийг хүүхэд, том хүн, тусгай хэрэгцээтэй иргэд ашиглах боломжоор ханган барьж, байгуулжээ. 

"Рио Тинто Монгол" компанийн Паркийн төслийн инженер Роберт Зетка хэлэхдээ "Япон архитектурын шийдэл бөгөөд ариун цэврийн байгууламжийг дан бетоноор хийсэн. Ийм дулаалгатай бетонон барилга Монголд байхгүй. Гүйцэтгэгч компани, зураг төслийнхөн маань ур ухаанаа уралдуулан байж энэхүү бүтээн байгуулалтуудыг хийж гүйцэтгэлээ.

Усалгааны систем маань ч мөнхийн эргэлттэй. Борооны усаа буцааж ашиглах, шингээх боломжтой. Бид ус зүйн судалгааны тайланг хийлгэсэн. Манай парк 100 жилд нэг болдог үер тохиовол эхний 24 цаг усанд дарагдаад дараа нь бүх усыг шингээх тооцоог хийлгэсэн байгаа. 

Ариун цэврийн байгууламжийн голд байгаа мод анхнаасаа тухайн байрлалд байсан. Бид модыг сугалж, хөндөлгүйгээр байгууламжийг босгосон" гэв.  

“Мазаалай” тоглоомын талбай модны үрстэн хамгаалалттай

Тоглоомын талбайн голд мазаалай хэлбэрийн гулсуурыг шийджээ. Хүүхдийг гэмтээх аюултай материалаас татгалзаж, аюулгүй байдалд нэн тэргүүнд анхаарсан аж. 

Тиймээс ч тоглоомын талбайн гадаргуу дээр зөөлөн модон үртсийг тавьсан. Түүнчлэн хүүхдийн идэвхтэй хөдөлгөөнийг дэмжсэн тоглоомуудыг Англиас авчирч, байрлуулсан байна. 

Удахгүй скейтбордын хажууд утасны бүхээг байрлуулна. Ингэснээр хүүхэд төөрөх эсвэл тэдэнд тусламж хэрэгтэй үед ашиглах боломж бүрдэнэ гэдгийг "Рио Тинто" компанийн мэргэжилтнүүд хэлж байв. 

Анхан шатны фитнесийн төхөөрөмжтэй парк: 

Энэ талаар "Парк зөвхөн хүүхдийнх гэж ойлгох хандлага хүмүүсийн дунд байдаг. Гэхдээ бүх насныхан паркийг зорьж, амралт чөлөөт цагаа өнгөрүүлэх боломжтой. 

Насанд хүрэгчид, өндөр настай хүмүүс ашиглаж болохуйц анхан шатны фитнес төхөөрөмжийг бид цэцэрлэгт хүрээлэн дотор шийдсэн" гэдгийг онцолж байлаа. 

Тэжээвэр амьтныхаа амны цангааг тайлах боломжтой 

Ногоон байгууламжийн дотор талд 200 метр тутам чиглүүлэгч самбар байрлуулжээ. Тухайн самбараас ерөнхий мэдээллийг авч, зорьсон газартаа хүрч болно. 

Тухайлбал нохой, муур зэрэг тэжээвэр амьтныхаа амны цангааг тайлах боломжтой ус оргилох тусгай төхөөрөмжийг амьтны хэсэгт байрлуулсан байна. 

Даам, шатар тоглох ширээ: 

Цөөрмийн хажууд шатар даам тоглох модон ширээг хүртэл шийджээ. 

Цөөрөм: 

Цөөрмийн ус тогтонги байвал бохирддог учраас байнгын хөдөлгөөнтэй байлгах системийг суурилуулсан байна. 

Нүдэнд харагдахгүй боловч цөөрмийн ус байнгын хөдөлгөөнтэй байх аж. Ингэснээр бохирдох асуудал гарахгүй, өөрөө өөрийгөө цэвэршүүлэх боломжтой болно. 

Нуурын дэргэдэх модон асар: 

Нуурын дэргэд маш нарийн хийцлэлтэй улаан асар баригдаж байна. 

Дорнын уламжлалт соёлыг агуулсан модон асрын урлал хийцийг хийхэд гар чимхлүүр ажил их шаарддаг. Тиймээс асрын дээр тэмдэглэл бичихгүй, ухамсартай байхыг "Рио Тинто" компанийнхан уриалж байлаа.  

Нуурын дэргэдэх улаан асрыг наадмаас өмнө бэлэн болгохоор ажиллаж байгаа аж.