П.Нүрзэд: 34 жилийн өмнө эхлүүлсэн МоАХ-ны тэмцэл дуусаагүй

Гэрэл зургийг MPA агентлагийн онцгой зөвшөөрөлтэйгөөр ашиглав

Монголын Ардчилсан Холбооноос/МоАХ/ ардчиллын анхны цуглаан болж байсан Улаанбаатар чуулгын үүдэнд тус холбооны гишүүд өнөөдөр хэвлэлийн хурал зохион байгууллаа.

Энэ үеэр МоАХ-ны Удирдах Зөвлөлийн гаргасан мэдэгдлийг дэд дарга П.Нүрзэд уншиж танилцуулав.

"Ардчилсан хувьсгалын 34 жилийн ой тохиож байгаа ч баярлахаасаа харууссан, алдаа оноогоо дэнслэх түүхэн цаг үетэй нүүр туллаа.

Монгол Улс авлигын индексээрээ дэлхийд 2017 онд 103-т орсон бол 2022 оны байдлаар 116 дугаарт бичигдсэн нь авлига хурдтай өсөж байгаа 10 орны тоонд орлоо.

2012 онд Ардчиллын индексээр 61 дүгээрт байсан бол 2023 онд 77 дугаарт ортлоо ухарч, дэлхийн хуурамч ардчилалтай улсын тоонд багтсан төдийгүй ардчиллын үнэт зүйл хэвлэлийн эрх чөлөөний индексээр 88 дугаарт бичигджээ.

Дэлхий нийт бидэнд өгсөн үнэнтэй нүүр тулж, яг одоо шийдвэрлэх алхам хийхгүй бол цаг алдсаар ядуурлын туйлд хүрлээ.

Үндсэн хуулиар хүлээн зөвшөөрөгдсөн нам нэрийн доорх гэмт бүлэглэлүүд өөрсдөдөө зориулж хууль батлах замаар улс орноо тонон дээрэмдэх үйл явц эрчимтэй, өдөр бүр хулгай зэлгий өрнөсөөр байна. Ийм дээрэмтэй МоАХ хэрхэвч эвлэрч чадахгүй.

Үг хэлэх, хэвлэн нийтлэх эрх чөлөөг боомилж, авлигын шүүх байгуулахаар зүтгэж, эх орныхоо газар шороог гаднынханд 100 жилээр эзэмшүүлэх хүртлээ ялзарсан нийгмийг хүлээн зөвшөөрөхгүй.

34 жилийн өмнөх хийж хэрэгжүүлж байсан тэмцэл дуусаагүйг МоАХ-ноос мэдэгдье" гэлээ.