ХҮН НАМ УЛАМ ТЭЛСЭЭР
Өнөөдөр ХҮН намын төлөөлөх зөвлөлийн хуралдаан болж өнгөрлөө. /2023.09.15/ Хуралдааныг ХҮН намын дарга Т.Доржханд удирдаж явууллаа. Тус хурлаар ХҮН нам Удирдах зөвлөлийн гишүүдээ нэмж сонгон, Төлөөлөх зөвлөлийн бүрэлдэхүүнээ өргөтгөн тэлж, орон тооны бус нарийн бичгийн дарга нараа томиллоо.
Шинээр сонгогдсон Удирдах зөвлөлд Дэлхийн банканд ажиллаж байсан эдийн засгийн ухааны доктор Б.Түвшинтулга, Харвардын их сургуулийг Төрийн удирдлагаар төгссөн, МУИС-ийн Бизнесийн сургуулийн доктор С.Санасэр, Варшавын их сургуульд бизнесийн удирдлагын магистр хамгаалсан, МУИС-ийн докторант, МУИС-ийн Бизнесийн сургуульд багшилж буй Ш.Энхтуул, Тайванийн Үндэсний Дун Хуа их сургуулийг байгалийн ухааны магистраар суралцсан Э.Золзаяа, Бизнесийн удирдлагын Докторант С.Айнагүл нарын 5 гишүүд нэмэгдсэн байна.
Олон улсын хөгжлийн эдийн засагч Ц.Лут-Очир, Хууль зүйн ухааны доктор Г.Дөлгөөн, Фүүд тракын О.Билгүүн, Төрийн удирдлагын магистр Д.Өнөржаргал нар нарийн бичгийн даргаар томилогдов.
ХҮН намын дарга, УИХ-ын гишүүн Т.Доржханд тус хурлын индэр дээрээс 2024 оны УИХ-ын сонгуулийн сунгаа албан бусаар эхэлснийг мэдэгдсэн төдийгүй ирэх сонгууль урьд урьдын сонгуулиас эрс ялгаатай, хурц өрсөлдөөнтэй болохыг онцлов.
Өнгөрсөн 33 жилийн хугацаанд Монгол улс нийгэм, эдийн засгийн хөгжил, улс төрийн өрсөлдөөний нэгэн үеийг туулж, ардаа орхилоо. Миний бие ХҮН намаа төлөөлж УИХ-д сонгогдон, ажилласан 3 жилийн хугацаанд тогтолцооны өөрчлөлт хийхийг манлайлан ажилласны үр дүнд Монгол Улсын Үндсэн хуульд өөрчлөлтийг авч ирж чадлаа. Тус өөрчлөлтийн үр дүнг улс төр, бизнесийн хүрээнд ирэх 30 жилд Монгол улс ҮСРЭНГҮЙ ХӨГЖИЛД хүрэх суурь өөрчлөлт болсныг тодотгож байна.
Бид харьцангуй богино хугацаанд улс орны хөгжилд эрс өөрчлөлт авч ирэх үйл хэргийг манлайлж чадсан. Өнгөрсөн хугацаанд гаргасан манлайлал, эрч хүч, нэгдмэл зорилгоо улам бататган 2024 оны сонгуульд том үр дүнд хүрэхийг нийт гишүүд, дэмжигчдэдээ уриалж байна.
ХҮН намын Төлөөлөх зөвлөлийн хурал гишүүд, дэмжигчдэдээ эрч хүч өгсөн, улс төрийн намын хурлын эмх цэгц, соёл, хандлагыг нэг түвшин ахиулсан төдийгүй 2024 сонгуульд бэлэн буйгаа тод харуулснаараа онцлог болж өндөрлөлөө.
Эх сурвалж: ХҮН нам
