"Clean up" төслийн залуус хүүхдийн тоглоомын 600 талбайг цэвэрлэнэ

Дэвшилтэт Социал Демократ клубийн залуус өнөөдөр Улаанбаатар хотын хамгийн их хөдөлгөөнтэй байдаг Багшийн дээдийн нүхэн гарцыг цэвэрлэж, угаалаа.

2022 онд Байгаль орчин, аялал жуулчлалын яам, Туул голын сав газрын захиргаа, Дэвшилтэт Социал Демократ клубээс санаачлан хэрэгжүүлсэн “CLEAN UP -2” төслийн хүрээнд “Бүх нийтийн цэвэрлэгээ”-ний ажлыг зохион байгуулсан.

Цэвэрлэгээнд ерөнхий боловсролын 26 сургуулийн ахлах ангийн сурагч, 10 гаруй их, дээд сургуулийн оюутнууд нэгдсэн юм.

Өнгөрсөн жилийн цэвэрлэгээнд 6,000 гаруй залуу сайн дураараа оролцож Дунд гол, Бэлх гол, Улиастайн гол болон Зайсангийн гүүр, Баянзүрхийн гүүр, Маршалын гүүр гэсэн 12 байршил дахь хог хаягдлыг цэвэрлэсэн юм.

Цэвэрлэгээний гол зорилго нь гудамж талбай, байгаль орчинд хаягдсан хог хаягдлыг цэвэрлэх бус нийслэлчүүд, нийт иргэдэд хоггүй орчинд ажиллаж амьдрах, амарч зугаалах болон хог хаядаг сэтгэхүйг өөрчлөхөд чиглэгдэж байсан юм. 

“CLEAN UP” төсөл энэ жил үргэлжлэн хэрэгжинэ. Энэ жил Монгол Улсын ирээдүй болсон хүүхэд, багачууд руугаа чиглэн ажиллах юм. Энэ хүрээнд Улаанбаатар хотод буй хүүхдийн 600 тоглоомын талбайг цэвэрлэхээр болжээ. Тус арга хэмжээг клубийн залуус “CLEAN-UP – BUBBLE FESTIVAL” гэж нэрлэсэн байна.