Хөгжлийн Банктай холбоотой 80 хүн, дөрвөн хуулийн этгээдэд яллах дүгнэлт үйлдсэн хэргийг шүүх өнөөдөр хүлээн авчээ
Нийслэлийн Прокурорын газраас Хөгжлийн Банкны хэрэгт холбогдуулан 80 хүн, 4 хуулийн этгээдэд яллах дүгнэлт үйлдэн шүүхэд шилжүүлжээ.
"Хөгжлийн Банканд холбогдох 493 хавтас эрүүгийн хэргийг Сүхбаатар дүүргийн Эрүүгийн хэргийн анхан шатны шүүх өнөөдөр 16:00 цагт хүлээн авлаа.
493 хавтаст хэргийг нэг бүрчлэн шалгаж хүлээн авахад нэлээд хугацаа шаардагдсан. Эрүүгийн хэргийг шүүх тус аргачлалаар хүлээж авдаг" хэмээн шүүхийн эх сурвалж мэдээлэв.
АТГ-ын Мөрдөн шалгах хэлтсийн албаны дарга М.Даваатогтох "Хөгжлийн Банкны албан тушаалтнуудад холбогдох хэрэгт АТГ-аас мөрдөн шалгах ажиллагааг 2022 оны нэгдүгээр сарын 28-ны өдрөөс явуулж байгаа. Мөрдөн шалгах ажиллагаа өргөн цар хүрээнд хийгдэж эхэлсэн. Тодруулбал, нийт 94 хүн болон хуулийн этгээдийг яллагдагчаар татаж, прокурорын байгууллагад шилжүүлсэн. Үүний дотор УИХ-ын гишүүнээр одоо ажиллаж байгаа, УИХ-ын гишүүн асан хүмүүс ч бий" гэсэн мэдээллийг өгч байв.
