Б.Хөхөө: Нийслэлийн нутаг дэвсгэрт зохион байгуулсан хурдан морины уралдаанд нэг ч хүүхэд эндээгүй

Баяр наадмын үеэр хурдан мориноос хүүхэд унаж бэртсэн ослын талаар Нийслэлийн гэр бүл, хүүхэд, залуучуудын газрын Хүүхдийн хөгжил хамгааллын хэлтсийн дарга Б.Хөхөөгөөс тодрууллаа.

Тэрбээр “Баяр наадмын үеэр буюу долдугаар сарын 10, 11, 12, 13-ний өдрүүдэд нийслэлийн нутаг дэвсгэрт зохион байгуулсан хурдан морины уралдааны үеэр манай байгууллагын зүгээс уралдаанч хүүхдүүдийн аюулгүй байдлыг хангах тал дээр хяналт тавьж ажилласан. Энэ хугацаанд нэг ч хүүхэд мориноос унаж эндээгүй. Харин 49 хүүхдийг Яаралтай түргэн тусламжийн машинаар очиж авсан. Эдгээр хүүхдүүдийн 30 нь мориноосоо өөрөө буусан бол 19 нь уралдааны үеэр унасан.

Тэднээс гадна бэртэж, гэмтсэн байж болзошгүй таван хүүхдийг эмнэлэгт хүргэсэн. Тэдний хоёр нь бэртсэн болохыг эрүүл мэндийн байгууллагаас манайд мэдээлсэн. Бэртэлтэй хоёр хүүхдийн нэг нь тархины гэмтэлтэй, нөгөөгийнх нь бугалга гэмтсэн гэдэг мэдээллийг бидэнд ирүүлээд байна.

Харин нөгөө гурван хүүхэд хөнгөн гэмтэлтэй гэж эмнэлгийн байгууллага дүгнэсэн.

Хурдан мориноос унасан хүүхдүүдийг эцэг эх, асран хамгаалагчид нь хүлээлгэн өгч ажилласан” гэлээ.