Уншиж байна ...

Р.Дагва: Энэ жил 590 автобусаар нийтийн тээвэрт парк шинэчлэл хийнэ

Б.МАНЛАЙ, IKON.MN
2022 оны 5 сарын 13
iKon.MN
Зураг зураг
Гэрэл зургийг mpa.mn

Нийслэлийн Засаг даргын зөвлөл өнөөдөр хуралджээ. Хурлаар Нийтийн тээврийн парк шинэчлэлтийн талаар авах зарим арга хэмжээний тухай хэлэлцсэн байна.

Нийслэлд орон нутгийн өмчит болон хувийн хэвшлийн нийт 19 хуулийн этгээд 134 чиглэлд нийтийн тээврийн үйлчилгээ эрхэлж байна. Эдгээр компанийн 1,240 тээврийн хэрэгсэл бүртгэлтэй байдаг боловч тогтмол 985 тээврийн хэрэгсэл үйлчилгээ үзүүлж байгаа юм байна.

2022-2023 онд 856 автобус, троллейбус үйлчилгээнээс хасагдахаар болжээ.

12 хүний бүрэлдэхүүнтэй Ажлын хэсэг өнгөрсөн хугацаанд нийтийн тээврийн өнөөгийн нөхцөл байдалд дүн шинжилгээ хийж, Улаанбаатарын нийтийн тээврийн үйлчилгээг иргэдэд хүртээмжтэй, чанартай хүргэхэд 1,432 тээврийн хэрэгсэл хэрэгтэй гэж үзжээ.

Нийслэлийн Засаг даргын Цахим хөгжил, хууль, эрх зүй, төрийн үйлчилгээний асуудал хариуцсан орлогч Р.Дагва "Энэ жилийн хувьд 590 автобусаар буюу нийтийн тээврийн 60 хувьд парк шинэчлэл хийхээр төлөвлөсөн. 2024 оны эцэс гэхэд 80 хувьд хүргэх зорилт тавьж ажиллаж байгаа" гэв.

Зөвлөлийн хурлаас тэмдэглэл гарч, гишүүдийн саналыг тусган, Нийтийн тээврийн парк шинэчлэлтийн талаар авах зарим арга хэмжээний тухай НИТХ-аар хэлэлцүүлэхээр болов.