Өчигдөр 18 хүний шинжилгээнээс коронавирус илэрч, улсын хэмжээнд нийт 941 батлагдсан тохиолдол бүртгэгдэж байна
Эрүүл мэндийн яамнаас COVID-19 халдварын нөхцөл байдлын талаар мэдээлэл хийж байна.
ШУУД ҮЗЭХ: /2020.12.18/
“Өчигдөр улсын хэмжээнд 9,070 хүнд шинжилгээ хийхэд 18 хүнээс коронавирус илэрлээ. Шинээр илэрсэн 18 тохиолдол нь Баянзүрх дүүргийн нэгдсэн эмнэлгийн голомтоос илэрсэн байна.
Ингээд Монгол Улсын хэмжээнд коронавирусийн бүртгэгдсэн нийт тохиолдол 941 боллоо. Үүнээс өнөөдрийн байдлаар 473 хүн эдгэрээд байгаа бол нийтдээ 452 батлагдсан тохиолдол эмчлэгдэж байна” хэмээн ХӨСҮТ-ийн Тандалт судалгааны албаны дарга А.Амбасэлмаа хэллээ.
Эрүүл мэндийн яамны хэлтсийн дарга Д.Нарангэрэл “Улсын хэмжээнд оношилгооны цэгээр 399,329 хүн үйлчлүүлж, коронавирус илрүүлэх шинжилгээнд хамрагдсан байна. Өнгөрсөн 24 цагийн хугацаанд ЗӨСҮТ-ийн өвчин судлалын баг өвчлөл гарсан газруудын 30 объектын 5,375 метр квадрат талбайг ариутгажээ.
Мөн хугацаанд тусгай дугаарын долоон утсанд 10,328 хүн хандаж, эмнэлэг үйлчилгээтэй холбоотой болон коронавирустэй холбоотой зөвлөмж авсан бол ЭМЯ-ны 32-30-02 дугаарын утсанд 305 хүн холбогдож зөвлөгөө авжээ” гэсэн мэдээлэл өглөө.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглахдаа эх сурвалжаа (ikon.mn) заавал дурдах ёстойг анхаарна уу!
