"Өнгөрсөн шөнө гэр хорооллын 114 айл өрхөөс угаарын хий өссөн тухай дуудлага ирсэн"
Нийслэл хотын гэр хорооллын айл өрхөөс угаарын хий өссөн тухай дуудлага мэдээлэл нэмэгджээ.
Энэ тухай Түлш хэрэглэгчдэд үйлчлэх төвөөс мэдээлснээр нэгдсэн хяналтын төвд өнгөрсөн шөнө буюу 11 дүгээр сарын 11-12-нд шилжих шөнө нийт 114 өрхөөс угаарын хий өссөн тухай мэдээлэл ирж, 342 иргэний эрүүл мэнд, амь насыг аюулаас сэргийлжээ. Иргэд угаарын хийн дуудлага өгөх бол 7011 9410 дугаарын утсанд холбогдох юм байна.
Харин 11 дүгээр сарын 10-11-нд шилжих шөнө 81 өрхөөс угаарын хий өссөн тухай мэдээлэл бүртгэгдсэн бөгөөд дуудлагын тоо нэмэгдэж байгааг мэдээлэв.
Угаарын хийн хордлогын шинж тэмдэг:
- Толгой өвдөх
- Чих шуугих
- Нүүр улайх (ягаан, хөхөлбөр туяатай болох)
- Огиулж бөөлжих
- Ханиалгах
- Ухаан балартаж унах
- Гуйвж, дайвах. Эдгээр шинж тэмдэг илэрвэл яаралтай 103 дугаарт дуудлага өгнө.
“Түлш хэрэглэгчдэд үйлчлэх төв” ОНӨААТҮГ нь бие даасан статустай бөгөөд тус байгууллагын үйл ажиллагааны зардалд энэ онд нийслэлийн төсвөөс ₮8.2 тэрбумыг зарцуулахаар баталжээ. Тус төвийн 500 гаруй ажилтан 24 цагаар ээлжлэн нийслэлийн хэмжээнд хатуу болон хийн түлш хэрэглэгч өрхүүдийг угаарын хийн хордлогоос урьдчилан сэргийлэх, пийшин, яндангийн битүүмжлэл, ашиглалтын аюулгүй байдлыг хангах зөвлөмж өгч, эрүүл мэнд, амь насны аюулгүй байдлыг хамгаалах үйл ажиллагааг хэрэгжүүлдэг байна.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
