Л.Мөнхтүшиг: Өчигдөр Эрээн хотоос 60 машин нарийн ногоо импортолсон

Гэрэл зургийг mpa.mn

ЭМЯ-ны ээлжит хэвлэлийн хурлын үеэр албаныхан сэтгүүлчдийн асуултад хариуллаа.

- Халдвар гарсан эмнэлэгт коронавируст халдварын үед баримтлах дэглэмийг хэрхэн баримталж байсан бэ?

А.Амбасэлмаа: Амьсгалын замын халдвар ялангуяа коронавируст халдварын үед эмнэлгийн ажилчид, хэвтэн эмчлүүлэгчид болон сахиурууд халдвар хамгааллын дэглэм сахих нь чухал. Халдвартай хүний ойрын хавьталтай хавьтал болсон, 15 минутаас дээш хугацаагаар амны хаалтгүй харилцсан бол халдвар авсан байх эрсдэлтэй гэсэн дүгнэлт байгаа. Тиймээс нэг давхарт байгаа хүмүүс тасгаасаа амны хаалтгүй гарах, ариун цэврийн өрөө орохдоо амны хаалт зүүхгүй байх зэргээс үүдэлтэйгээр халдвар тархсан гэж таамаглаж байгаа. Тиймээс бусад эрүүл мэндийн байгууллагууд эмнэлэг доторх дэглэмийг сайтар сахих нь чухал байна. 

- Сөүлийн нислэгийг цуцалсан нь ямар шалтгаантай вэ?

Л.Мөнхтүшиг: Хатуу хөл хорионы дэглэм тогтоож, дотоодын халдварыг тодорхой хэмжээнд хяналтад авсны дараа тусгай үүргийн нислэгийг эргэн сэргээсэн. Ингэхдээ дотоодын болзошгүй хавьтал, гадаадаас ирж буй иргэдийг тусгаарлах байрны төлөвлөгөөг гаргаж, УОК-ын Шуурхай штабын даргаар батлуулан ажиллаж байна. Энэ хүрээнд арванхоёрдугаар сарын нислэгүүдийг төлөвлөсөн. Харамсалтай нь дотоодын шинэ халдваруудын ойрын хавьтлуудыг тусгай үүргийн нислэгээр ирэх иргэдийг байлгах байранд тусгаарлах зайлшгүй шаардлага үүсээд байна. Өнөөдөр батлагдсан тохиолдлуудын хавьтлуудаас шинэ халдвар илрэх тохиолдолд тусгаарлах байрны хэрэгцээ гарна. Тиймээс энэ сард үйлдэгдэх хамгийн сүүлийн нислэгийг цуцлахаас өөр аргагүй байдалд хүрсэн. Бид иргэдээ маш сайн ойлгож байгаа. 

- Импортын зарим хүнсний ногоо тасарсан. Тасарсан бараа бүтээгдэхүүнийг хилээр нэвтрүүлэх ажлыг хэрхэн хэрэгжүүлэх вэ?

Л.Мөнхтүшиг:  Цар тахлын улмаас тогтоосон хязгаарлалтын хүрээнд импортын болон экспортын бүтээгдэхүүнүүнийг хэвийн горимоор тээвэрлэхэд хүндрэл үүсэж байгаа. Дотоодод халдвар гарснаас хойш ГХЯ экспорт болон импортыг хэвийн болгох чиглэлээр өндөр анхаарал тавьж ажиллаж байна. Замын-Үүд-Эрээн боомтоор хэвийн үед хоногт 200 орчим машин ачаа нэвтрүүлдэг байсан бол одоо 20 орчим болж буураад байгаа. Үүнийг өдөртөө 50 болгох зохицуулалтыг хийж байна. 

Хүнсний бүтээгдэхүүн тэр дундаа нарийн ногоо тасалдсантай холбоотойгоор өчигдөр Эрээн хотоос 60 машин нарийн ногоог импортолсон. 

Мөн бусад хил залгаа бүсүүдэд ногоон бүс үүсгэж тээврийг үргэлжлүүлэхээр ажиллаж байгаа.

ВИДЕО: