Ш.Үнэнбат: Урт цагааны үйл ажиллагааг зогсооно. Барилгыг нь тордоод нэмэргүй, ямар ч бэхэлгээ хийх боломжгүй
Нийслэлийн өмчийн харилцааны газрын удирдлагууд “Урт цагаан” үйлчилгээний төвийн үйл ажиллагаатай өнөөдөр танилцлаа.
Энэ үеэр Нийслэлийн өмчийн ашиглалт, удирдлагын газрын дарга Ш.Үнэнбат тус үйлчилгээний төвийн үйл ажиллагааг зогсооно хэмээн мэдэгдэв.
"Анх гэрээ байгуулсан 30 АНН дамаар 200 гаруй хүмүүс давхар түрээсэлж байгаа"
Тэрбээр хэлэхдээ “Жуулчны гудамжинд байрлах "Урт цагаан" нийслэлийн өмчит гуравдугаар байр нь 1958 оноос хойш засвар хийлгүй өнөөдрийг хүртэл үйл ажиллагаа явуулж байна. Энэ обьектын үйл ажиллагааг нь зогсоох нийслэлийн Мэргэжлийн хяналтын удаа дараагийн дүгнэлт гарсан.
Түүнчлэн барилга нь галын эрсдэл өндөр, газар хөдлөлтийн чичирхийллийг ч даах чадваргүй, Улаанбаатар хотын хамгийн эрдэлтэй обьектын нэгээр жил болгон тодорхойлогддог.
Түрээслэгч нар стандартад нийцүүлэх шаардлагыг удаа дараа тавьдаг. Гэвч түрээслэгчид стандартад нийцсэн ажлын байрыг бий болгож чадахгүй байсаар өнөөдрийг хүрсэн юм.
Шаардлага биелүүлэхгүй байгаа учир үйл ажиллагааг нь зогсоох гэхээр олуулаа өргөдөл гомдол гаргаж, өмч хөрөнгийн маргаан үүсгэдэг.
Нийслэлийн зүгээс ашиглалтын шаардлага хангахгүй дээр үйл ажиллагааг нь зогсоож энэ обьектоос орлого олохоо болих шийдвэр гарсан. Тиймээс үйл ажиллагааг нь зогсоох болно" гэлээ.
Мөн тэрбээр "Энэ обьект хотын төсөвт олигтой орлого оруулдаггүй. Тодруулбал, Нийслэлийн төсвөөс жилд "Урт цагаан"-д 450 орчим сая төгрөг гаргадаг ч буцаан олж байгаа орлого нь 500 орчим сая төгрөг.
Бид 30 байгууллагатай түрээсийн гэрээ байгуулсан. Тэд дамаар 200 гаруй хүмүүс давхар түрээсэлж байгаа.
Энэ байшинг тордоод ч нэмэргүй, ямар ч бэхэлгээ хийх боломж байхгүй. Харин энэ барилгыг нураах эсэх асуудал нийслэлийн иргэдийн төлөөлөгчдийн хурлын бүрэн эрхэд байдаг" гэдгийг онцолсон юм.
"С.Амарсайхан хотын дарга болсноос хойш түрээсийг хоёр дахин нэмсэн"
"Урт цагаан хөгжлийн холбоо" ТББ-ын гүйцэтгэх захирал н.Цэндбаатар “Ядарсан иргэдийнхэээ ажлын байрыг нураадаг задарсан төр байж болохгүй.
Одоогоор нийт 28 түрээслэгч байна. Эдгээр хүмүүс иргэдийгээ ажлын байраар хангаж байгаа бөгөөд урт цагааны үйл ажиллагааг нь тодорхой хэмжээнд таслалгүй явуулж, нийслэлийн иргэддээ үйлчилж байна.
С.Амарсайхан хотын дарга болсноос хойш Урт цагааны түрээсийн үнийг хоёр дахин нэмсэн. Энэ хууль бус шийдвэр. Энэ мэтчилэн төрөөс түрээслэгч нарт дарамт учруулж байна. Энэ байрыг чөлөөлөх нь хүмүүст олон хардлага төрүүлж байна” хэмээн ярив.
"Бид ажлын байргүй болмооргүй байна"
Түрээслэгч Д.Лхагважав “Би 20 жил оёдлын үйл ажиллагаа явуулж байна. Урт цагааныг хүмүүс хөдөөнөөс хүртэл зорьж ирж, үйлчлүүлдэг.
Албаныхан байнгын муу талыг сурталчилж, нийгэмд буруу ойлголт төрүлж байна. Урт цагааны энэ ганц барилга олон жил болсон юм биш. 40 мянгатын барилгууд 70 жил болсон өнөөдрийг хүртэл байна.
Бид хэвийн үйл ажиллагаа явуулж байна. Энэ объектод 10 гаруй жил нэг ч засвар хийгээгүй. Хэрэв бидэнд засвар үйлчилгээ хийх чиглэл өгвөл бид амьжиргаагаа залгуулж байгаа энэ газартаа засвараа хийгээд цааш үйл ажиллагаагаа явуулна. Бид ажлын байргүй болмоооргүй байна” гэлээ.
Гэрэл зургийг Д.Занданбат /Mpa.mn/
