Гуравдугаар сарын 2-ныг дуустал Монгол Улсын иргэдийг урд хөрш рүү явахыг хориглолоо

Гэрэл зургийг ЗГХМОНХХ-ээс авав.

Монгол Улсын Ерөнхийлөгч Х.Баттулгыг Норвегийн хаант улсад хийсэн айлчлалаас ирсэн даруйд ҮАБЗ хуралдсан. ҮАБЗ-өөс гаргасан зөвлөмжийн дагуу Засгийн газар 14:00 цагаас ээлжит бусаар хуралдсан билээ. Хуралдаанаас дараах шийдвэрүүдийг гаргасан байна. 

• БНХАУ-тай хиллэдэг агаар, төмөр зам, автозамын бүх боомтоор БНХАУ-ын иргэд болон тус улсын нутаг дэвсгэрээр дамжин ирэх бусад улсын иргэдийг 2020 оны 2 дугаар сарын 1-ний өдрөөс 2020 оны 3 дугаар сарын 2 хүртэл хугацаанд хилээр нэвтрүүлэхийг хориглов.
   
• Мөн хугацаанд Монгол Улсын иргэд БНХАУ-д зорчихыг хориглолоо. Гэхдээ ажлын зайлшгүй шаардлагаар явах бол Улсын онцгой комиссын даргын зөвшөөрлийг үндэслэн хилээр гаргах юм.
   
• БНХАУ-аас ирэх, мөн тус улсаар дамжин ирж байгаа Монгол Улсын иргэдийг 2020 оны 2 дугаар сарын 6 хүртэл бүх боомтоор,  үүнээс хойш 2020 оны 3 дугаар сарын 2 хүртэл зөвхөн Буянт-Ухаа болон Замын-Үүд боомтоор оруулна.
   
• Хилийн Даян-Хуньшанзюй, Байтаг-Улиастай, Бургастай-Лаоемяо, Сүмбэр-Рашаан, Хавирга-Архашаат автозамын боомтуудыг түр хаалаа.
   
• Булган-Такашикэ, Шивээхүрэн-Сэхээ, Гашуунсухайт-Ганцмод, Ханги-Мандал, Замын-Үүд-Эрээн, Бичигт-Зүүнхатавч, Баянхошуу-Өвдөг боомтоор хил нэвтэрч байгаа ачаа тээврийн хэрэгсэл, жолооч нарт энэ дэглэм хамаарахгүй.
   
• Замын-Үүд-Эрээн чиглэлд ачаа тээврийн галт тэрэг хуваарийн дагуу зорчих бөгөөд зүтгүүрийн бие бүрэлдэхүүн, агаарын хөлгийн багийн гишүүдэд хорио цээр мөн хамаарахгүй юм.
   
• Хорио цээрийн хугацаанд бараа таваарын импорт, экспортыг хязгаарлахгүй.
   
• Түүнчлэн шинэ коронавирусын өвчинтэй тэмцэхэд нь зориулж БНХАУ-д 200,000 ам.доллартай тэнцэх хэмжээний мөнгөн тусламж үзүүлэхээр болов.