Харилцан визгүй зорчих асуудлыг судалж, шийдвэрлэхээ БНСУ-ын Ерөнхий сайд амлалаа

Гэрэл зургийг mpa.mn

БНСУ-ын Ерөнхий сайд Ли Наг Ён Монгол Улсад айлчилж байна.

Тэрбээр Монгол Улсын Ерөнхий сайд У.Хүрэлсүхтэй албан ёсны хэлэлцээ хийлээ. Үүнд:

1. БНСУ-ын 300 сая ам.долларын буцалтгүй тусламжаар нэр бүхий 10 аймагт дулааны цахилгаан станц барих төслийг эрчимжүүлнэ.
2. 500 сая ам.долларын хөнгөлөлттэй зээлээр “Солонго-1”, “Солонго-2” орон сууцны хороолол барих төслийн хэрэгжилтийг эрчимжүүлэхээр тохиров. Ингэснээр 1,500 айл түрээсийн орон сууцанд орох боломж бүрдэнэ.
3. Ирэх жил хоёр улсын хооронд дипломат харилцаа тогтоосны 30 жилийн ой тохионо. Энэ хүрээнд харилцаагаа Стратегийн түншлэлийн хэмжээнд хүргэн нэг шат ахиулж ажиллахаар тохиров.
4. Алсдаа харилцан визгүй зорчих асуудлыг судлан шийдвэрлэхээр болов.
5. Эмч нарыг БНСУ-д мэргэжил дээшлүүлэх сургалтад түлхүү хамруулна.
6. Ирэх жил тохиох дипломат харилцаа тогтоосны 30 жилийн ой угтан соёл, урлаг, спортын уралдаан, тэмцээн зохион байгуулахаар болов.
7. Албан ёсны хэлэлцээний үеэр харилцан тохирсон олон асуудлыг энэ оны эхний хагаст болох Засгийн газар хоорондын комиссын IV хуралдаанаар нарийвчлан хэлэлцэнэ.

Хөтөлбөр ёсоор БНСУ-ын Ерөнхий сайд Ли Наг Ён Монгол Улсын Ерөнхийлөгч Х.Баттулга, УИХ-ын дарга Г.Занданшатарт бараалхана.

Мөн “UB smart card” төсөлтэй  танилцан, Монгол- Солонгосын найрамдлын цэцэрлэгт хүрээлэн, Ли Тэ Жүн эмчийн дурсгалын цэцэрлэгт хүрээлэнд зочлох юм.