УИХ-ын чуулганы өнөөдрийн хурал эхэллээ. Чуулганы хуралдаан Ерөнхий сайдыг огцруулах асуудлыг хэлэлцэж байна. Хуралдааны эхэнд УИХ-ын дарга М.Энхболд өөрийн хүсэлтээр энэ удаагийн чуулганыг удирдахаас татгалзаж УИХ-ын дэд дарга Л.Энх-Амгалангаар удирдуулахаар болов. Нэр бүхий 32 гишүүн Засгийн газрыг огцруулах асуудалд УИХ-ын дарга М.Энхболд ашиг сонирхлын зөрчилтэй тул чуулганыг удирдуулахгүй хэмээн эсэргүүцээд байсан юм.

Өнөөдөр 73 гишүүн хуралдаа иржээ. Тэд саналаа хэлж байна.

УИХ-ын гишүүн Т.Аюурсайхан: Ашиг сонирхлын зөрчилтэй гишүүдийн хуралдаанд оролцуулахгүй байх үүднээс зохион байгууллалттайгаар үг авах гэж байна.  

УИХ-ын гишүүн С.Бямбацогт: Ёс зүйн дэд хороо хүний муу үзэх гэж хуралдах гэж байгаа юм биш. Ашиг сонирхлын зөрчлийг гишүүдэд зайлшгүй сануулах үүрэгтэй юм. 

УИХ-ын гишүүн Ц.Нямдорж: Их хурал дотор ашиг сонирхлын зөрчилгүй хүн байгаа юм уу. Хэн нь ашиг сонирхлын зөрчилтэй, хэн нь зөрчилгүй болчихсон юм. Ашиг сонирхлын зөрчил гэдэг бол жишээ нь, сайдын асуудал яригдаж байхад тухайн сайд нь хуралд оролцохгүй байхыг л хэлээд байгаа юм. 

Өнөөдөр У.Хүрэлсүх гэдэг Ерөнхий сайдыг огцруулах асуудал яригдаж байна. Төрийн гурван өндөрлөг та гурвыг төрөө тараа гэж биш төрөө тайван байлга гэж төрийн толгойд суулгасан шүү. Энийгээ хэзээ ухаарах вэ. Би байсан цагтаа цагдааг энэ заваан юманд оролцуулахгүй. Уржигдар АТГ-ын дэд дарга, хэлстийн дарга хоёр ордонд орж ирж байсан. Хууль хяналтын байгууллагыг энэ заваан юмандаа оролцуулдагаа болиорой. 

УИХ-ын гишүүн Ж.Мөнхбат: Сангийн сайдын ширээн дээр Л.Болдын “Богд” банкаар бонд гаргуулна гэсэн бичиг байгаа. 

УИХ-ын гишүүн С.Санжмятав: Монголын төрийн асуудал нэлээд ярвигтай болсон цаг үед бид хуралдаж байна. Засгийн газрыг огцруулахтай холбоотой зарим зүйл хэлье. Гишүүдийн нэр төр, үр хүүхэд рүү дайрч давшилдаг асуудалдаа анхаараарай. Өнөөдөр хэн нэгэн гишүүнийг хөөх асуудал байхгүй. Хуулийн байгууллагаас эцэслэн тогтоогүй байхад.