Мексикийн ерөнхий прокурор картелын ажиллуулж байсан гэх “устгалын газар”-ын талаар үнэнийг олж тогтоохоо амлав

Энэ сарын эхээр сураггүй алга болсон ойр дотны хүмүүсээ эрэн сурвалжлагч бүлгийн идэвхтнүүд Мексикийн Халиско мужийн төв Гуадалахара хотын ойролцоо Теучитлан хэмээх эдлэн газраас шарил чандарладаг байсан нууц газрыг илрүүлсэн юм.

Тэндээс их хэмжээний үнс, олон мянган ясны хэлтэрхий, 200 хос гутал олдсон нь гэмт хэрэгтнүүд хулгайлсан хүмүүсээ устгадаг байсан байж болзошгүй гэсэн сэжиг төрүүлж, нийгмийг айдаст автуулаад байгаа.

Мексик даяар 124,000 гаруй хүн ихэвчлэн хар тамхины гэмт хэрэгтнүүдийн гарт сураггүй алга болсон гэх албан ёсны бүртгэл бий.

Өчигдөр буюу Лхагва гарагт Мексик улсын ерөнхий прокурор Алехандро Герц Манеро хэвлэлийн хурал зохион байгуулж, дээрх олдворын талаар олон нийтэд мэдээлэл өгчээ.

 

Мексик улсын ерөнхий прокурор Алехандро Герц Манеро

Энэ үеэр тэр орон нутгийн засаг захиргаа уг газрыг олон сарын өмнө илрүүлсэн ч зохих мөрдлөгийг явуулалгүй төв засгийн газраас нуусан хэмээн буруутгасан байна.

Тухайлбал Халиско мужийн эрх баригчид орон нутгийн картелын эзэмшилд байсан энэ газрыг өнгөрсөн оны есдүгээр сард илрүүлж байжээ.

Сураггүй алга бологсдын цогцсыг системтэйгээр устгадаг байсан байж болзошгүйг харуулсан энэ олдвор өнгөрсөн оны аравдугаар сард тангараг өргөхдөө хүчирхийллийг таслан зогсоож, нийгмийн аюулгүй байдлыг сайжруулахаа амлаж байсан Мексикийн ерөнхийлөгч Клаудиа Шэйнбаумд томоохон дарамт шахалт учруулаад байна.

Мексик нь холбооны улс тул дээрх хэргийг Халиско мужийн хуулийн байгууллагууд шалгаж тогтоох үүрэгтэй.

Гэхдээ энэ нь онцгой тохиолдол тул холбооны засгийн газраас мөрдөн шалгах ажиллагаанд оролцохоор болсон байна.

Мөн Халиско мужийн эрх баригчид болон картелын хоорондын хэлхээ холбоог давхар мөрдөн шалгахаар болсныг Манеро өчигдөр мэдэгджээ.

“Хэрвээ мужийн прокурорууд ямар нэг хууль бус зүйлд оролцсон байвал бид үүнд хамаатай бүх албан тушаалтнуудад хариуцлага тооцохын төлөө бүхнийг хийх болно” гэж тэр хэлсэн юм.

Дуулиант газар илэрсний дараа Мексикийн ерөнхийлөгч Шэйнбаум сураггүй алга болсон хүмүүсийг эрэн сурвалжлах ажлыг эрчимжүүлэх хэд хэдэн арга хэмжээ зарлаад байгаа.

Ингэхдээ тэр бас дээрх олдворыг улс төрийн ашиг хонжооны зорилгоор ашиглахыг оролдож буй сөрөг хүчнээ шүүмжилсэн юм.

 

Мексикт сураггүй алга болсон хүмүүсийн талаар ном бичиж байсан Чантал Флорес “Халискогийн олдвор нь одоогийн засгийн газар, бас өмнөх ерөнхийлөгч Лопез Обрадорын засгийн газар асуудлыг нуугаад зогсохгүй, олон нийтийг төөрөгдүүлж, залилахад оролцдог байсныг харууллаа. Хүмүүс сураггүй алга болох явдал арилаагүй цагт хүчирхийлэл, гэмт хэрэг энэ улсад буурахгүй” гэж ярьжээ.

Одоогоор Халискогийн эрх баригчид илэрсэн газарт хэвлэл мэдээллийнхэн болон сураггүй алга бологсдын ойр дотны хүмүүсийг нэвтрүүлэхгүй байгаа юм.

Ерөнхий прокурор Манеро энэ байдлыг өөрчилж, хамаарах хүмүүст нээлттэй болгохоор төлөвлөж байгаагаа өчигдөр мэдэгдсэн байна.

Халискод үйл ажиллагаа нь төвлөрдөг Мексикийн хамгийн хүчирхэг картелуудын нэг Халискогийн Шинэ Үеийнхэн бүлэг дээрх олдвороос зайгаа барьж, өөрийнх нь нэр хүндийг унагахын тулд бодит баримтыг гуйвуулсан “аймшгийн кино зохиож байна” хэмээн идэвхтнүүдийг буруутгасан мэдэгдэл гаргажээ.

Эх сурвалж: Reuters