Эрүүл Мэндийн Яам Н.Учрал сайдын үүрэг болгосон “Зөвшөөрлийн тухай хууль”-ийн хэрэгжилтийг хангуулж хууль давсан журмуудаа цуцаллаа

Гэрэл зургийг MPA агентлагийн онцгой зөвшөөрөлтэйгөөр ашиглав

Засгийн Газрын Хэрэг Эрхлэх Газар (ЗГХЭГ)-ын дарга Н.Учрал “Америкт их эмчээр ажиллаад ирсэн хүн Монголд ирээд эмнэлэг байгуулах гэхэд туйлдаа хүрч зөвшөөрөл авч чадахаа болиод аргаа барсандаа хүнээс тусгай зөвшөөрөл авсан ч хулхидууллаа гэсэн гомдол надад ирсэн.

Эрүүл мэндийн үйлчилгээний үйл ажиллагаа явуулахад 133 шат дамжлага дамжиж байна. 133 төрийн албан хаагчтай уулзана. 133 набор, 133 оройн хоол, 133 уулзалт. 133 хүний ах дүү, найз нөхөд, ураг удмын холбоо, нутгийн зөвлөлийг эрж хайдаг. Ийм байхад Монголд яаж бизнес эрхлэгчид амьдрах юм бэ?

Тийм учраас Эрүүл Мэндийн Яаманд тодорхой чиглэл өгмөөр байна. Очирбат дарга та анзаараагүй байх. 2023 оны танай сайдын тушаал байгаа шүү. Одоо энэ тушаалаа цуцал. Сайдын тушаал гэдэг цуцалж болдоггүй зүйл юм уу? Наад журмыг чинь барьчхаад танай мэргэжилтнүүд 5, 10 төгрөг татварт төлье гэсэн хувийн хэвшил бизнес эрхлэгчдийн нурууг нь авч байна шүү дээ.” хэмээн өнгөрөгч долоо хоногт өөрийн байр суурийг илэрхийлсэн юм. 

Иргэд ч энэ асуудал дээр олон бичиг баримт бүрдүүлнэ гэдэг хэдэн сараар бүтэхгүй болно гэсэн үг, хүндрэл ихтэй байна гэдэг авлигал ихсэхийн нэр, хуулиас давсан журмыг цуцлах нь зүйтэй зэрэг байр суурийг илэрхийлсэн байна. 

Тэгвэл өнөөдөр буюу хоёрдугаар сарын 13-нд эрүүл мэндийн чиглэлээр хүчин төгөлдөр мөрдөгдөж байсан долоон журмыг хүчингүй болгожээ.

“Энэ журмууд хүчингүй болсноор Эрүүл мэндийн чиглэлээр тусгай зөвшөөрөл олгох процесс бүрэн цахимжиж, цахимаар зөвшөөрөл хүсэх, цахимаар олгогддог болно” хэмээн ЭМЯ-ны Хуулийн хэлтсийн дарга Б.Одгэрэл хэллээ. 

Түүнчлэн ЭМЯ-ны Эмнэлгийн тусламжийн бодлогын газрын дарга Р.Гантуяа “Цаашид аймаг, нийслэлийн эрүүл мэндийн газар, эм эмнэлгийн хэрэгслийн хяналт зохицуулалтын газруудад эдгээр тусгай зөвшөөрлийг чирэгдэлгүй байдлаар үзүүлэх боломж бүрдэж байна” гэсэн юм.