Венесуэл улс АНУ-аас хууль бус цагаачдаа татан авахаар хоёр онгоц илгээжээ

АНУ-аас хууль бус цагаачдаа татах хоёр нисэх онгоцыг илгээснээ Венесуэлийн засгийн газар өчигдөр зарлажээ.

Нэгдүгээр сарын 31-ний өдөр АНУ-ын тусгай элч Ричард Гренелл  нийслэл Каракас хотод айлчлахдаа Венесуэлийн ерөнхийлөгч Николас Мадуротой энэ талаар тохиролцсон юм байна.

Буцааж татах цагаачдын дотор алдар цуутай “Tren de Aragua” гэмт хэргийн бүлэгтэй холбоотой хүмүүс байгааг Венесуэлийн гадаад хэргийн яам мэдээлжээ.

Венесуэлээс буцахдаа Гренелл тус улсын шоронд хоригдож байсан АНУ-ын зургаан иргэнийг дагуулж явсан юм.

АНУ-ын иргэдийг суллаж, гэмт хэрэгтнүүдээ буцаан татсаны хариуд Мадурогийн дэглэм ямар боломж эдлэхээр тохиролцсон нь одоогоор тодорхойгүй байна.

Ямартай ч Гренеллийн айлчлалын дараа Мадуро хоёр улсын харилцаанд “шинэ үе” эхэлж байгааг мэдэгдсэн юм.

Ерөнхийлөгч Дональд Трампын хувьд хууль бус цагаачдыг албадан гаргах АНУ-ын түүхэнд хамгийн том кампанит ажлыг эхлүүлээд байгаа.

Албадан гаргах хүмүүсийн ихэнх нь Латин Америкийн орнуудаас ирсэн цагаачид юм.

Эх сурвалж: AFP