Сүүлийн жилүүдэд төв суурин газарт амьдрах хүмүүсийн тоо нэмэгдэж байна. Үүнтэй холбоотой халаалтын улиралд уламжлалт нүүрсний хэрэглээ бүх газарт бий болсон.

Агаар, орчны бохирдол хамгийн өндөр байгаа газар бол Улаанбаатар хот.

Нийслэлийн агаарын бохирдлыг дараах гурван эх үүсвэр бүрдүүлж байна. Тодруулбал 

• Бохирдлын 56 орчим хувь нь 198,840 айл өрхийн яндангаас гарч байгаа. Хамгийн их агаарын бохирдолтой хэсэг нь Долоон буудал, Чингэлтэй, Хайлааст, Баянхошуу, Шар хад, Улаан хуаран орчмын бүс.
• ЖАЙКА олон улсын байгууллагын 2022 оны тайланд хотын агаарын бохирдлын 28.9 хувь автомашинаас гарч байгаа азотын дутуу исэл болон бусад хортой элемент бүрдүүлсэн гэжээ. 
• Бусад буюу 15.5 хувьд нь цахилгаан станцууд, нам даралтын зуухнууд болон төвлөрсөн хогийн цэгтэй холбоотой. 

Нэг айлын хашаанд 2-3 яндан байгааг тооцож үзэхэд бараг 300,000 гаруй яндан байна. 

2013 онд Улаанбаатарт бүртгэлтэй автомашины тоо 325,000 байсан. 11 жилийн дараа нийслэлд бүртгэлтэй машины тоо 805,000-д хүрсэн.

Өнгөрсөн 2011 оноос хойш Улаанбаатар хотын агаарын бохирдлыг бууруулах чиглэлд дараах зардлыг үрсэн.

2011-2024 оны хугацаанд нийт 340.2 тэрбум төгрөгийг угаар, орчны бохирдлыг бууруулах чиглэлээр зарцуулжээ.

Үүнээс гадна “Тавантолгой түлш” сайжруулсан түлшний үйлдвэрт өнгөрсөн цаг хугацаанд нийт нэг их наяд 450 гаруй тэрбум төгрөгийг татаас болгож өгсөн.

 

Цаашид авах арга хэмжээний төлөвлөгөө: 

Одоо бид 100 хувь нүүрсний хэрэглээтэй байгаа. 

2025 онд 5,620 айлыг орон сууц руу шилжүүлнэ гэж төлөвлөсөн. Энэ жил ашиглалтад орох орон сууцныхаа төлөвлөлтөө тооцож, газар чөлөөлөх айлуудынхаа төлөвлөлттэй уялдуулж байгаа юм.

Энэ жилдээ 

• 15,000 айлыг LPG буюу хийн түлшинд
• 5,700 айлыг LNG буюу байгалийн хийн түлшний системд холбох төлөвлөгөөтэй байна.

 

LPG-гийн хэрэглээг шийдэхдээ аюулгүй байдал талаас гэрийнх нь гадна талд саванд байршуулж, улмаар дотогш зөвхөн усан бойлуурын халаалтын системийг оруулахаар төлөвлөж байна. 

Гуравдугаар сарын 1-нээс эхлээд одоогийн мидлингийн үйлдвэрлэлээ бүрэн зогсоож байгаа. Мидлингийн дараагийн шилжилтийн түүхий эд болох "Эрдэнэс  Тавантолгой"-н баяжуулсан нүүрсээр үндсэн түүхий эдээ хийж, нүүрс шуудайлж савлахаар төлөвлөж байгаа.

2029 онд

• 40,000 айлыг орон сууцжуулах
• 60,000 айлыг LPG хийн түлшинд
• 82,000 айлыг LNG байгалийн хийн түлшинд
• 30,000 айл нүүрс түлж үлдэнэ.

Энэ төлөвлөгөөгөөр явбал 2030 оноос Улаанбаатар хот “Хатуу түлшний хэрэглээнээс бүр мөсөн татгалзах” юм. 

 

Агаарын бохирдлын гол шалтгаан бол 1984 оноос хойш нэг ширхэг ч дулааны цахилгаан станц бариагүйтэй холбоотой. 

Энэ хүйтэн хотод төвлөрсөн халаалтын систем, эх үүсвэрийг нэмж барьж чадаагүй 40 гаруй жилийн алдаатай бодлогын үр дүн нь агаарын бохирдлыг одоогийн түвшинд хүргэсэн.

Ногоон бүс:

Улаанбаатар хотын орон сууцны хорооллуудтай залгаа байгаа хэсгүүдийг ногоон бүс болгоё.

• Нэгдүгээр хороолол
• 3,4 дүгээр хорооллын арын дэнж
• Гандан
• Эх нялхас
• 32-ийн тойрог
• Дэнжийн мянга
• Улсын бүртгэл орчим
• 100 айл
• Манба дацан хийд орчмын айл өрх буюу 50,000 гаруй айлыг эхний ээлжид ногоон бүсэд татаж, LNG, LPG холболтуудаа үе шаттай явуулъя.